စကြာမင်း တိုင်းရင်းဆေးစက်ရုံက အမျိုးသမီးတွေကို ဓမ္မတာ လာမလာ လုံချည်လှန်ကြည့်တဲ့ မန်နေဂျာနဲ့ စက်ရုံမှူးကို စစ်ကောင်စီရဲတပ်ဖွဲ့က သွားရောက်စစ်ဆေးခဲ့ပေမယ့် အရေးယူခဲ့တာမရှိဘူးလို့ အလုပ်သမားအရေး ဆောင်ရွက်သူတွေက New Day Myanmar ကိုပြောပါတယ်။
လူမှုကွန်ရက်မှာ စကြာမင်း တိုင်းရင်းဆေးစက်ရုံနဲ့ပတ်သက်ပြီး ဝေဖန်မှုတွေမြင့်တက်နေတာကြောင့် မတ် ၂၆ ရက်မှာ စစ်ကောင်စီရဲတပ်ဖွဲ့က သွားရောက်စစ်ဆေးခဲ့တာဖြစ်တယ်လို့ ဆိုပါတယ်။
“ကျွန်တော်တို့ကို အလုပ်သမားတွေရဲ့ပြောပြချက်အရတော့ ရဲတွေ မနေ့ကလာစစ်မေးသွားတယ်ပြောတယ်။ စစ်မေးတဲ့အခါမှာလည်း စက်ရုံမှူးက ဘာမေးရင် ဘာဖြေဆိုတဲ့ဟာကို ပြောခိုင်းတယ်။ သူတို့ပြောခိုင်းတဲ့ဟာကိုပဲ ပြောရတာ။ သူတို့ရွေးထားတဲ့လူတွေကပဲဖြေရတယ်ပြောတယ်။ ကျွန်တော်ထင်ပါတယ်။ ရဲတွေက သူတို့ကိုပိုက်ဆံပေးလိုက်ရင် ပါးစပ်တွေက ပိတ်သွားရော။ ငွေနဲ့ဖြေရှင်းရင်ရတယ့်ပုံစံ။ ကျွန်တော်တို့ကတော့ အမျိုးသမီးတွေ စက်ရုံတွေမှာနစ်နာမှုမရှိစေဖို့၊ လူ့အခွင့်အရေးတွေချိုးဖောက်ခံရမှုမရှိစေဖို့ ဆက်ပြီးလုပ်ဆောင်သွားမယ်။ အလုပ်သမားဝန်ကြီးဌာနကိုလည်း စာပို့သွားမယ်” လို့ အလုပ်သမားသမဂ္ဂများပူးပေါင်းဆောင်ရွက်ရေး ကော်မတီ (CCTU) တာဝန်ရှိသူ တဦးက New Day Myanmar ကိုပြောပါတယ်။
စကြာမင်း တိုင်းရင်းဆေးစက်ရုံအနေနဲ့ စက်ရုံဝန်ထမ်းအမျိုးသမီးတွေအပေါ် လူ့အခွင့်အရေးချိုးဖောက်တာတွေကြောင့် သူတို့ရဲ့ထုတ်ကုန်ပစ္စည်းတွေကို အသုံးမပြုဖို့ တိုက်တွန်းမှုတွေရှိလာပါတယ်။
New Day Myanmar အနေနဲ့ စကြာမင်းတိုင်းရင်းဆေးခန်းကို ဖုန်းဖြင့်ဆက်သွယ်မေးမြန်းခဲ့ပေမယ့် ဖုန်းစက်ပိတ်ထားသလို လူမှုကွန်ရက်စာမျက်နှာကိုလည်း ဖျက်လိုက်ပါတယ်။
စကြာမင်းက တိုင်းရင်းဆေးထုတ်လုပ်တာဖြစ်သလို ဆေးကုခန်းလည်းထားရှိထားပြီး စကြာမင်း ကျီးပေါင်းဆေး၊ အားတိုးဆေး၊ အကြောဆေးစတဲ့ တိုင်းရင်းဆေးတွေကို ထုတ်လုပ်တာလည်းဖြစ်ပါတယ်။
ဓာတ်ပုံ – စကြာမင်းတိုင်းရင်းဆေး FB page
