စစ်ကိုင်းတိုင်း၊ ကသာခရိုင်၊ကသာမြို့နယ် အင်းတော်မြို့နယ်အစပ်မှာ စစ်ကောင်စီတပ်နဲ့ တော်လှန်ရေး တပ်တွေကြား မတ်လ ၁၅ ရက်နေ့ကဖြစ်ပွားခဲ့တဲ့ တိုက်ပွဲအတွင်း စစ်ကောင်စီဘက်မှ အင်အား (၃၀) ကျော် သေဆုံးခဲ့တယ်လို့ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ ပြည်သူ့ကာကွယ် ရေးတပ်မတော် (PDF)၊ စစ်ရုံးချုပ် က ဒီကနေ့မှာ ထုတ်ပြန်ပါတယ်။
ကသာခရိုင်၊ အင်းတော်မြို့နယ်အစပ် ကသာမြို့နယ်၊ ပင်လွတ်ရွာအနီး ပန်းတောင်ကြီး၊ ပန်းတောင်လေး တောင် မှာ ကသာမြို့ ခမရ-၃၀၉ မှ ထွက်လာတဲ့ စစ်ကောင်စီစစ်ကြောင်းကို မတ်လ (၁၅) ရက်က တိုက်ခိုက်ရာ လက်နက် (၅၄) လက် သိမ်းဆည်းရမိခဲ့တယ်လို့လည်း ဆိုပါတယ်။
အဆိုပါတိုက်ပွဲကို ဗိုလ်မှူး လင်းထက် ဦးစီးပြီး ခမရ (၁၀၆၊ ၃၀၉)၊ ခလရ-၆ ပူးပေါင်းအင်အား (၁၅၀) ခန့်ပါတဲ့ စစ်ကြောင်းကို အမှတ်(၁) စစ်ဒေသကွပ်ကဲမှုနဲ့ EROs (KIA)၊ KPDF၊ ကသာခရိုင် တပ်ရင်း-၁၊ မိုးတားတိုက်နယ် ပကဖ နဲ့ ကသာမြို့နယ် ပကဖ ပူးပေါင်းအဖွဲ့တွေက တိုက်ခိုက်ခဲ့ခြင်း ဖြစ်တယ်လို့ သိရပါတယ်။
တိုက်ပွဲအတွင်း စစ်ကောင်စီဘက်မှ (၃၃) ဦး သေဆုံးပြီး (၁၀) ဦး ထိခိုက်ဒဏ်ရာခဲ့ကာ (၃၁) ဦး ဖမ်းဆီးရမိထား တယ်လို့လည်း ဆိုပါတယ်။
ဆက်လက်ပြီး ရန်သူ့ထံမှ MA-1 (၂၉) လက်၊ MA-2 (၆) လက်၊ MA-3 (၁၂) လက်၊ MA-4 (၃) လက်၊ MA-11 (၁) လက်၊ MA-15 (၁) လက်၊ Anti Drone Gun (၁) လက်၊ MA-10 ဗုံးသီး (၃၇) လုံး၊ MA ကျည် (၈၀၀၀) တောင့်၊ MA-15 ကျည် (၂၀၀၀) တောင့်၊ ၆၀ မမ ဗုံးသီး (၁၇) လုံး၊ ကျည်အိမ် (၁၁၃) ခု၊ ကျောပိုး Jammer (၁) ခု၊ ဆက်သွယ်ရေးစက် (၁) လုံး၊ အထိုင်ဖုန်း (၁) လုံး၊ ကျည်ကာဦးထုပ် (၁၂) လုံး သိမ်းဆည်းရမိခဲ့ကြောင်းနဲ့ တိုက်ပွဲအတွင်း မိမိတို့ဘက်မှ ရဲဘော် (၂) ဦး ကျဆုံးခဲ့တယ်လို့လည်း ထုတ်ပြန်ထားပါတယ်။
ပုံစာ-(အင်းတော်တိုက်ပွဲအတွင်း တော်လှန်ရေးတပ်ဖွဲ့တွေ ဖမ်းဆီးရမိခဲ့သည့် စစ်ကောင်စီတပ်သားများနှင့် လက်နက်နက်ခဲယမ်းများ)
ဓာတ်ပုံ – NUG/MOD
