၁၉ မတ်၊ ၂၀၂၅
ယမန်နေ့ (မတ်လ ၁၈ ရက်) မနက်ပိုင်းက သာကေတမြို့နယ်မှာ ပြန်ပေးဆွဲခံရတဲ့ ဒေါ်စန္ဒာလင်းဆိုတဲ့ အမျိုးသမီးတစ်ဦးကို ယနေ့မှာ ပြန်လည်တွေ့ရှိခဲ့တယ်လို့ စစ်ကောင်စီ ရဲတပ်သားတစ်ဦးက New Day Myanmar ကိုအတည်ပြုပါတယ်။
အဆိုပါ အမျိုးသမီးဟာရွှေဆိုင်ဖွင့်ဖို့ မနက် ၉ နာရီဝန်းကျင်အချိန်က သူနေအိမ်ရှိရာထူပါရုံ ၂၂ လမ်းကနေ စျေးကို အသွား လမ်းထိပ်မှာ အာရာဖတ်အမျိုးအစားမော်တော်ယာဉ်တစ်စီးပေါ်မှ လူ ၄ ဦးက ဖမ်းဆီးခေါ်ဆောင်သွားတာဖြစ်ပါတယ်။
“ပြောရရင် သူ့ဇာတ်ကြောင်းကရှုပ်တယ်။ သူ့အရင်ရည်းစားက ခေါ်သွားတာ။ မနေ့ကတည်းက ပြန်တွေ့တာ။ နေအိမ်ကိုတော့ ဒီမနက်ကမှ ပြန်ရောက်တာ။ ရွှေတွေတော့ ပြန်မပါလာဘူး” လို့ သာကေတမြို့နယ်က စစ်ကောင်စီလက်အောက်ခံ ရဲသတင်းရင်းမြစ်က ပြောပါတယ်။
အဆိုပါ အမျိုးသမီးဟာ သာကေတမြို့နယ်ရှိ အမှတ် ၁ စျေးမှာ လင်းလက်ရွှေစင် အမည်နဲ့ ရွှေဆိုင်ဖွင့်လှစ်ထားတာဖြစ်ပြီး စခန်းကတာဝန်ရှိသူတွေအနေနဲ့ ဆက်လက်မေးမြန်းနေတယ်လို့ သိရပါတယ်။
“ရုန်းရင်းဆန်ခတ်ဖြစ်နေတာတော့ တွေ့လိုက်တယ်။ ဒါပေမယ့် သမီးရည်းစားအချင်းချင်း ရန်ဖြစ်နေတဲ့ပုံစံပေါက်နေတော့ ဘယ်သူမှ ဝင်မဆွဲကြဘူး” လို့ ရပ်ကွက်အတွင်းနေထိုင်သူတဦးကပြောပါတယ်။
