၁၀ ဖေဖော်ဝါရီ၊ ၂၀၂၅
ကရင်ပြည်နယ်၊ မြ၀တီမြို့နယ်၊ ကျောက်ခက်ဒေသက ကျားဖြန့်ရာဇဝတ်ဂိုဏ်းတွေမှာ အဓမ္မဖမ်းဆီးပြီး နှိပ်စက်ခံနေရတဲ့ ရုပ်သံဖိုင်နဲ့ ဓာတ်ပုံတွေ ပျံ့နှံ့လာပြီးနောက်မှာ နှိပ်စက်ခံနေရတဲ့ ပါကစ္စတန်နိုင်ငံသားတွေအပြင် တခြားနိုင်ငံခြားသား ၅၀ ဦးကျော်ကို ကယ်တင်ထားပြီး ထိုင်းနိုင်ငံဘက်ကို လွှဲပြောင်းပေးသွားမယ်လို့ DKBA အမှတ် ၁ စစ်ဒေသကွပ်ကဲရေးမှူးက ပြောဆိုကြောင်း ခေတ်သစ်သတင်းဌာနက ဖော်ပြထားပါတယ်။
DKBA အနေနဲ့ ရုပ်သံနဲ့ဓာတ်ပုံတွေမှာ ပါလာတဲ့ နှိပ်စက်ခံနေရသူတွေကို သွားရောက်ရှာဖွေ ခေါ်ယူနိုင်ခဲ့ပြီး တခြားနိုင်ငံခြားသားတွေကိုလည်း ကယ်တင်နိုင်ခဲ့တယ်လို့ ဆိုထားပါတယ်။ ကျောက်ခက်မှာ ဓာတ်ပုံထဲက ပါကစ္စတန် ၃ ယောက်ကို တွေ့ရှိကြောင်းနဲ့ မြဝတီပို့ချိန်မှာ စစ်ကောင်စီက စာတင်နေဆဲမို့ မပို့နိုင်ကြောင်း ပြောဆိုတဲ့အတွက် ထိုင်းအာဏာပိုင်တွေနဲ့ ဆက်သွယ်ပြီး ပို့ဖို့ လုပ်နေတယ်လို့ ဆိုပါတယ်။ နဂိုထဲက ကယ်တင်ထားတဲ့ ၁၆ ဦးနဲ့ ပေါင်းရင် ကယ်တင်ထားနဲ့ နိုင်ငံခြားသား ၅၀ကျော်ရှိပြီး မိသားစုဝင်တွေနဲ့ Video Call ပြောဆိုခိုင်းထားတယ်လို့ သိရပါတယ်။ မြဝတီမြို့နယ် ကျောက်ခက်မှာ ပါကစ္စတန်နိုင်ငံသား ၃ ဦးသာ ရှိတယ်လို့ DKBA က ပြောဆိုထားပါတယ်။
လက်ရှိ စုဆောင်းကယ်ဆယ် ရရှိထားသူတွေဟာ ပါကစ္စတန်၊ နီပေါ၊ ဖိလစ်ပိုင်နဲ့ အာဖရိကလူမျိုးနိုင်ငံသားတွေဖြစ်ပြီး လက်ရှိမှာ မြဝတီမှာ DKBA က စောင့်ရှောက်ထားကြောင်းနဲ့ မိခင်နိုင်ငံကို ပြန်ပို့ဖို့ ထိုင်းဘက်ကနေ လွှဲပြောင်းပေးမှာ ဖြစ်ပြီး စစ်ကောင်စီကို စာတင်ထားတုန်း ဖြစ်တယ်လို့ အတည်ပြုထားပါတယ်။ DKBA အနေနဲ့ ထိန်းချုပ်နယ်မြေအတွင်းက ကျားဖြန့်တွေကို ရှင်းလင်းသွားမယ်လို့ ပြောဆိုထားပြီး အကုန်ရှင်းလင်းပြီးရင် ထိုင်းနိုင်ငံက လျှပ်စစ်မီးနဲ့လောင်စာဆီ ပြန်လည်ရရှိဖို့ လုပ်ဆောင်မယ်လို့လည်း ဖေဖော်ဝါရီ ၉ ရက်က ထုတ်ပြန်ထားပါတယ်။ ဓာတ်ပုံ – လူမှုကွန်ယက်
