၂၅ စက်တင်ဘာ၊ ၂၀၂၄
ရှမ်းပြည်နယ်(မြောက်ပိုင်း)၊ လားရှိုးမြို့ကို စစ်ကောင်စီတပ်တွေက စက်တင်ဘာ ၂၄ ရက် သန်းခေါင်အချိန်နဲ့ စက်တင်ဘာ ၂၅ ရက် ဒီနေ့ သန်းခေါင်အချိန်တွေမှာ နှစ်ရက်ဆက်တိုက် ဗုံးကြဲလိုက်တယ်လို့ သိရပါတယ်။
စစ်ကောင်စီလေတပ်ဟာ ဒီနေ့မနက် ၂း၁၅ ၊ ၂း၁၈ နဲ့ ၂း၂၂ မိနစ်တို့မှာ ဗုံး ၃ ကြိမ် ကြဲချခဲ့တယ်လို့ ဆိုပါတယ်။ ရပ်ကွက် ၁၂ က လားရှိုးမြို့ နည်းပညာအထက်တန်းကျောင်းဝင်းထဲကို ဗုံး ၁ လုံးနဲ့ AT တပ်ဦးကျောင်းထဲကို ဗုံး ၂လုံး ကျရောက်ပေါက်ကွဲခဲ့တယ်လို့ဒေသခံတွေက ဆိုပါတယ်။ အပျက်အစီးနဲ့ လူထိခိုက်ဒဏ်ရာရမှုတွေကိုတော့ အတည်ပြု စုံစမ်းနေဆဲ ဖြစ်ပါတယ်။
စစ်ကောင်စီဟာ မနေ့က စက်တင်ဘာ ၂၄ ရက်မှာလည်း မနက် ၁ နာရီခွဲမှာ တစ်ကြိမ် ၊ မနက် ၄ နာရီမှာ တစ်ကြိမ် ဗုံးကြဲတိုက်ခိုက်တဲ့အတွက် အရပ်သားပြည်သူအမျိုးသမီးတစ်ဦးသေဆုံးပြီး ၁၅ ဦး ဒဏ်ရာရရှိခဲ့ပါတယ်။
စစ်တပ်ဟာ စက်တင်ဘာလအတွင်း လားရှိုးမြို့ကို ဗုံး ၅ ည ထက်မနည်း ကြဲချတာ ဖြစ်ပြီး ဗုံးကြဲတဲ့နေရာတွေဟာ ရုံး၊ ကျောင်း၊ အားကစားကွင်း နဲ့ လူအများစုတည်းခိုနေတဲ့ ဟိုတယ်တွေ ဖြစ်ပြီး အခြေခံအဆောက်အအုံတွေကို ရည်ရွယ်ချက်ရှိရှိ တမင်ဖျက်ဆီးနေတယ်လို့ လားရှိုးဒေသခံတစ်ဦးက ဆိုပါတယ်။
“ရပ်ကွက် ၁၂ ကို ကြဲသွားတာ ၊ အစတွေက ကချင်ကုန်းဘက်ထိတောင် ရောက်တယ်လို့ ပြောတယ်။ ပြင်းအားများတယ်။ မနက် ၃ နာရီထိ လေယာဉ်တွေ ဝဲနေတာ ၊ သူတို့မအုပ်ချုပ်ရရင် တမြို့လုံးကုန်ပစေ၊သေပစေဆိုတဲ့ စိတ်နဲ့ ဗုံးကြဲတာပါ”လို့ ဒေသခံတစ်ဦးက New Day Myanmar ကို ပြောပါတယ်။
စစ်ကောင်စီကို လေယာဉ်ဆီနဲ့ လေယာဉ် စက်ပစ္စည်းအစိတ်အပိုင်းတွေ ရောင်းချခြင်းမပြုဖို့ နိုင်ငံတကာကို ပိတ်ပင်ထားတဲ့ကြားက စစ်ကောင်စီဟာ ဗီယက်နမ်၊ စင်ကာပူကတဆင့် ရေကြောင်းကနေ လေယာဉ်ဆီတင်သွင်းနေတယ်လို့ Justice For Myanmar ရဲ့ စုံစမ်းတွေ့ရှိချက်အစီရင်ခံစာမှာ ဖော်ပြပါတယ်။
ပုံစာ – စက်တင်ဘာ ၂၅ ရက် လားရှိုးမြို့တိုက်ခိုက်ခံရတဲ့မြင်ကွင်း
Photo – FYV
