၂၈ မတ်၊၂၀၂၅
ပဲခူးတိုင်း၊ ပေါက်ခေါင်း – အုတ်တွင်း အမြန်လမ်းပိုင်းနဲ့ ရန်ကုန် – မန္တလေး အမြန်လမ်းပိုင်းတွေမှာရှိတဲ့ စစ်ကောင်စီတပ်စခန်းတွေနဲ့ ကားတွေကို ပြည်သူ့ကာကွယ်ရေးတပ်မတော် PDF တွေကတိုက်ခိုက်ခဲ့တာကြောင့် စစ်ကောင်စီအဖွဲ့ဝင် (၈) ဦးသေဆုံးတယ်လို့ NUG ကာကွယ်ရေးဝန်ကြီးဌာနက မတ်လ ၂၇ ရက်နေ့က အသိပေး ထုတ်ပြန်ထားပါတယ်။
ပြီးခဲ့တဲ့ မတ်လ ၂၅ ရက်နေ့က ပဲခူးတိုင်း၊ ပေါက်ခေါင်း – အုတ်တွင်း အမြန်လမ်းပိုင်းအတိုင်း မောင်းနှင်လာတဲ့ ရန်သူ့တပ် စစ်ကား ၂ စီးကို ဘော်ဒါကျေးရွာ နဲ့ ပေါ်လံကြီးကျေးရွာ ကြားမှာ ပြည်သူ့ကာကွယ်ရေးတပ်မတော်၊ စစ်ဆင်ရေးနယ်မြေ (၂)၊တိုင်းစစ်ဌာန (ပဲခူး)၊ ဗျူဟာ (၂၁)၊ တပ်ခွဲ (၃)၊ ပြည်ခရိုင်တပ်ရင်း (၃၆၀၂)က ကြားဖြတ် တိုက်ခိုက်ခဲ့ရာ အင်အား ၃၀ ခန့်ပါ စစ်ကား (၁) စီးချောက်ထဲ ပြုတ်ကျသွားခဲ့ပြီး ရန်သူ့တပ်ဖွဲဝင် (၇) ဦး သေဆုံးခဲ့ကာ (၁၂) ဦးခန့် ထိခိုက်ဒဏ်ရာ ရရှိခဲ့တယ်လို့ ဆိုပါတယ်။
ဆက်လက်ပြီး မတ်လ ၂၆ ရက်နေ့တွင်လည်း ရန်ကုန် – မန္တလေး အမြန်လမ်း ၁၂၇ မိုင်၊ မင်းရဲ ရဲစခန်းနဲ့ ၁၂၄မိုင် နတ်ရေတွင်းရဲစခန်းတွေတွေကို ပြည်သူ့ကာကွယ်ရေးတပ်မတော်၊ စစ်ဆင်ရေးနယ်မြေ (၂)၊ တိုင်းစစ်ဌာန (ပဲခူး)၊ ဗျူဟာ(၂၂)၊ အမှတ် (၃၈၀၁) တပ်ရင်းနဲ့ အမှတ်(၃၇၀၁) တပ်ရင်း တိုက တပြိုင်တည်း ဝင်ရောက် တိုက်ခိုက်ခဲ့ တယ်လို့ ဆိုပါတယ်။
အဆိုပါတိုက်ပွဲတွေအတွင်း ရန်သူ့တပ်ဖွဲဝင် (၁) ဦး သေဆုံးခဲ့ပြီး (၄) ဦး အပြင်းအထန် ထိခိုက်ဒဏ်ရာတွေ ရရှိခဲ့ကာ မိမိတိုဘက်မှ အထိအခိုက်မရှိ ပြန်လည်ဆုတ်ခွာ နိုင်ခဲ့တယ်လို့ အသိပေးထုတ်ပြန်ထားပါတယ်။
ဓာတ်ပုံ – NUG(MOD)
