၂ မတ်၊၂၀၂၅
တိုက်ပွဲဖြစ်ပွားနေတဲ့ ရခိုင်ပြည်နယ်၊ကျောက်ဖြူမြို့မှာ စစ်ကောင်စီအနေနဲ့ ကျောက်ဖြူရေနက်ဆိပ်ကမ်းစီမံကိန်း စတင်ရန် စစ်ကောင်စီပြင်ဆင်နေပါတယ်။
စီမံကိန်းကို ဆောလျင်စွာ စတင်နိုင်ဖို့ စစ်ကောင်စီနဲ့တရုတ် CITIC တို့ ဖေဖော်ဝါရီ ၂၈ ရက်နေ့မှာ ညှိနှိုင်းခဲ့တယ်လို့ စစ်ကောင်စီသတင်းထုတ်ပြန်ချက်တွေအရ သိရပါတယ်။
ကျောက်ဖြူရေနက်ဆိပ်ကမ်းစီမံကိန်းကို တရုတ် CITIC အုပ်စုက ၅၁ ရာခိုင်နှုန်း ပိုင်ဆိုင်ပြီး စီမံကိန်းရဲ့ ၄၉ ရာခိုင်နှုန်းကို စစ်ကောင်စီက ပိုင်ဆိုင်မှာဖြစ်ပြီး မူလက စီမံကိန်းရဲ့ ကုန်ကျစရိတ်ကို အမေရိကန်ဒေါ်လာ ၇.၃ ဘီလီယံ ထည့်ဝင်ဖို့ သဘောတူထားပေမယ့် ပထမအဆင့်အတွက် ဒေါ်လာ ၁.၃ ဘီလီယံနဲ့ပဲ စတင်ဖို့နဲ့ ပထမအဆင့်ပြီးမှ ထပ်တိုးရင်းနှီးမြှုပ်နှံမှုတွေ ထည့်ဝင်ဖို့ ပြင်ဆင်သဘောတူခဲ့တယ်လို့ သိရပါတယ်။
အသစ်ညှိနှိုင်းမှုအရ CITIC ဘက်က ရင်းနှီးမြှုပ်နှံမှုကို ၇၀ ရာခိုင်နှုန်းထည့်ဝင်မှာဖြစ်ပြီး မြန်မာဘက်က မြေနေရာအတွက် ၁၅ ရာခိုင်နှုန်းနဲ့ ရင်းနှီးမြှုပ်နှံမှုအတွက် ၁၅ ရာခိုင်နှုန်း ထည့်ဝင်ရမှာဖြစ်တယ်လို့ သိရပါတယ်။
ရခိုင်ပြည်နယ်တောင်ပိုင်း ကျောက်ဖြူမြို့နယ်မှာ စစ်တပ်နဲ့ အာရက္ခတပ်တော် AA ကြား တိုက်ပွဲဖြစ်ပွားနေပြီး စစ်ကောင်စီဘက်က လေကြောင်း တိုက်ခိုက်မှုတွေ၊ လက်နက်ကြီးနဲ့ ပတ်ခတ်မှုတွေပြုလုပ်နေတယ်လို့ ဒေသခံတွေထံကနေ စုံစမ်းသိရှိရပါတယ်။
