၁၇ မတ် ၊ ၂၀၂၅
ယောက်ကျားဖြစ်သူရှေ့တန်းမှာ သေဆုံးသွားပေမယ့် တပ်ထဲကျန်ခဲ့သူအမျိုးသမီးများအနေဖြင့် လိုင်းခန်းတွင်ဆက်လက်နေလိုပါက စစ်တပ်ထဲဝင်ရမယ်လို့ ကိုယ်တွေ့ကြုံခဲ့သူတစ်ဦးက New Day Myanmar ကိုပြောပါတယ်။
နိုင်ငံအဝန်းတိုက်ပွဲတွေ ဖြစ်ပွားနေပြီး စစ်ကောင်စီတပ်သားတွေအများအပြားသေဆုံးနေတာဖြစ်ပါတယ်။
တိုက်ပွဲအတွင်းသေဆုံးသွားတဲ့ စစ်သားတွေရဲ့အမျိုးသမီးတွေဟာ တာဝန်ထမ်းဆောင်မယ့် အမျိုးသားမရှိတော့ရင် နေအိမ်လိုင်းခန်းကနေဖယ်ပေးရတာဖြစ်ပါတယ်။
အကယ်၍ လိုင်းခန်းကနေမဖယ်လိုပါက ကျန်ခဲ့တဲ့အမျိုးသမီးဟာစစ်မှုထမ်းရမှာဖြစ်ပါတယ်။
” ကိုယ်တွေက အပြင်မှာနေစရာလည်းမရှိဘူး။ မိဘတွေကလည်း စွန့်လွှတ်လိုက်ကြတော့ ပြန်မခေါ်ရဲဘူး။ အမျိုးသားက ရခိုင်မှာကျသွားတာ။ လိုင်းခန်းကနေဖယ်ပေးရမှာ။ လိုင်းခန်းမှာဆက်နေချင်သေးတယ်ဆိုရင် တပ်ထဲဝင်ရမယ်။ အခုလည်း တပ်ထဲကအမျိုးသမီးတွေကို စစ်သင်တန်းပေးနေတယ်။ အကုန်လုံးက ရှေ့တန်းထွက်တော့ အမျိုးသမီးတွေပဲကျန်ခဲ့တာ။ လုံခြုံရေးအရ အလှည့်ကျကင်းစောင့်ရတယ်။ ကျွန်မက တပ်ထဲဝင်လိုက်ရတယ်။ အပြင်မှာလည်းနေစရာမရှိဘူးလေ။ အခုတော့ ဗဟိုကင်းစောင့်ရတယ်” လို့ သေဆုံးစစ်ကောင်စီတပ်သားရဲ့ အမျိုးသမီးက New Day Myanmar ကိုပြောပါတယ်။
စစ်ရှုံးနေတဲ့စစ်ကောင်စီဟာ တပ်သားလိုအပ်ချက်အများအပြားရှိနေတဲ့အတွက် ပေါ်တင်တမျိုး၊ ခိုးကြောင်ခိုးဝှက်နဲ့ ပေါ်တာဆွဲတာတွေ ပြုလုပ်လာပါတယ်။
စစ်ရှုံးစစ်ကောင်စီဟာ တပ်သားသစ်စုဆောင်းနေတာကြောင့် လူငယ်အများအပြားပျောက်ဆုံးနေတဲ့သတင်းဟာ နေ့စဉ်ရှိနေတာပါ။ ပျောက်ဆုံးသွားတဲ့လူငယ်အများစုဟာလည်း စစ်ကြောရေးကို ပို့ခံရပြီး ရှေ့တန်းကိုစေလွှတ်နေတာဖြစ်တယ်လို့ စုံစမ်းသိရှိရပါတယ်။
ပုံစာ – စစ်ခေါင်းဆောင်မင်းအောင်လှိုင်နဲ့ ဇနီးဒေါ်ကြူကြူလှ တိ့ အမျိုးသမီး စစ်သည်များကို တွေ့ဆုံစဉ်
ဓါတ်ပုံ – စစ်ကောင်စီ
