ဩစတြေးလျ အစိုးရအနေနဲ့ သူ့ရဲ့နိုင်ငံသားတွေကိုမြန်မာအပါအဝင် နိုင်ငံ ၁၀ နိုင်ငံကိုသွားရောက် လည်ပတ်တာမျိုး လုံးဝ မလုပ်ဘဲ ရှောင်ကြဉ်ဖို့ အသိပေးထုတ်ပြန်ထားပါတယ်။
ထုတ်ပြန်ထားတဲ့နိုင်ငံစာရင်းတွေအရ မြန်မာအပါအဝင် ရုရှား၊ မြောက်ကိုရီးယား၊ ဗင်နီဇွဲလား၊ ဟေတီ၊ အီရန်၊တရုတ်၊ ဆူဒန်၊ ဆီးရီးယား၊ ယူကရိန်း နဲ့ လစ်ဗျားတို့ ဖြစ်ပါတယ်။
အဆိုပါ စာရင်းထဲမှာပါတဲ့ နိုင်ငံတွေဟာ လက်နက်ကိုင် ပဋိပက္ခတွေ၊ အကြမ်းဖက်မှု ပြဿနာတွေ၊ ပြည်တွင်း မငြိမ်သက်မှုတွေနဲ့ တရားလက်မဲ့ ဖမ်းဆီးမှုတွေထူထပ်နေတာကြောင့် ဘေးမကင်းတဲ့ ဇုန်နယ်မြေတွေဖြစ်နေတယ်လို့ဩစတြေးလျက ဆိုပါတယ်။
အဲဒီ နိုင်ငံတွေဟာ မငြိမ်သက်မှုတွေ ဆိုးဆိုးရွားရွား ကြုံတွေ့နေသလို နိုင်ငံခြား ခရီးသွား ဧည့်သည်တွေနဲ့ ဆက်စပ်တဲ့ လုပ်ငန်းကဏ္ဍတွေမှာလည်း ရှုပ်ထွေးပြီး မူမှန်မဟုတ်တဲ့ သက်ရောက်မှုတွေ ဖြစ်ပေါ်နေစေတယ်လို့ ဆိုပါတယ်။
၂၀၂၁ ခုနှစ်၊ စစ်အာဏာသိမ်းပြီးနောက်ပိုင်းဖြစ်ပေါ်လာတဲ့ ပြည်တွင်း ပဋိပက္ခတွေကြောင့် ဩစတြေးလျအနေနဲ့ အဓိကထုတ်ပြန်သတိပေးထားတာဖြစ်ပါတယ်။
ထို့ပြင် မြန်မာနိုင်ငံရဲ့ ကမ္ဘာလှည့် ခရီးသွား ကဏ္ဍဟာသိသိသာသာ ကျဆင်းလာနေပြီး ၂၀၂၅ ခုနှစ်ရောက်လာတဲ့ထိ အခြေအနေတွေက ထိလွယ်ရှလွယ်နဲ့ ခန့်မှန်းရ ခက်နေဆဲလို့လည်း ဆိုပါတယ်။
ယခုလို ဘေးမကင်းတဲ့ ဇုန်နယ်မြေအဖြစ်သတ်မှတ်ခံထားရတာဟာ ပြည်တွင်းခရီးသွားလုပ်ငန်းကို များစွာထိခိုက်စေတယ်လို့ စစ်ကောင်စီ မြန်မာနိုင်ငံခရီးသွားလုပ်ငန်းရှင်များအသင်းက New Day Myanmar ကိုပြောပါတယ်။
မြန်မာနိုင်ငံရဲ့ခရီးသွားလုပ်ငန်းဟာ ကိုဗစ်ကြောင့် ထိခိုက်ထားသလို စစ်တပ်အာဏာသိမ်းပြီးနောက်ပိုင်းမှာလည်း ကျဆင်းသွားခဲ့တာဖြစ်ပါတယ်။
ပုံစာ – ချင်းတော်လှန်ရေးတပ်ဖွဲ့ ဝင်တဦးကို စစ်ပွဲဖြစ်ပွားထားသော အဆောက်အဦးနဲ့ တွေ့ရစဉ်
ဓါတ်ပုံ – ရစ်ချက်ဟော်ဆီ/ Crisis Group
