၁ မတ်၊ ၂၀၂၅
မြန်မာနိုင်ငံဟာ ကမ္ဘာပေါ်မှာ အဆိုး ဆုံးလူ့အခွင့်အရေးချိုးဖောက်ခံနေရတဲ့ နိုင်ငံ တနိုင်ငံဖြစ်တယ်လို့ ကုလသမဂ္ဂ လူ့အခွင့်အရေးဆိုင်ရာ မဟာမင်းကြီး ဗော်လ်ကာ တာ့ခ် ကပြောကြားလိုက်ပါတယ်။
ဖေဖော်ဝါရီလ ၂၈ ရက်က ဆွစ်ဇာလန်နိုင်ငံ ဂျနီဗာမြို့မှာ ကျင်းပတဲ့ လူ့အခွင့်ရေးကောင်စီညီလာခံမှာ သူက ခုလိုပြောကြားခဲ့တာဖြစ်ပါတယ်။
မြန်မာနိုင်ငံမှာ စစ်ပွဲတွေဖြစ်နေတာ၊ စီးပွားရေး အလွန်ကျဆင်းတာ၊ ပြည်သူတွေ နေရပ်စွန့်ခွာထွက်ပြေးနေရတာတွေ အပါအဝင် ဖော်ပြလို့ မရတဲ့ ဆင်းရဲ့ဒုက္ခတွေကို မြန်မာပြည်သူတွေခံစားနေရတယ်လို့ သူကပြောပါတယ်။
၂၀၂၁ ခုနှစ် စစ်တပ်အာဏာသိမ်းချိန်ကစပြီး ခုခံတိုက်ခိုက်မှုတွေကြောင့် အင်အားချိနဲ့လာတဲ့ စစ်တပ်ဟာ လေကြောင်းတိုက်ခိုက်မှုတွေအများအပြားပြုလုပ်နေပြီး အကြမ်းဖက်လုပ်ရပ်တွေ လုပ်နေတာကြောင့် နေရပ်စွန့်ခွာထွက်ပြေးနေရသူ ၃ ဒသမ ၇ သန်း အထိရှိနေပြီလို့ ဆိုပါတယ်။
ဒါ့အပြင် အဖက်ဖက်က ချွတ်ခြုံ ကျမှုတွေကြောင့် အခုနှစ်အတွင်း လူ ၁၅ သန်းလောက် ငတ်မွတ်ခေါင်းပါးမှုတွေ ကြုံခဲ့ရပြီး လူနှစ်သန်းလောက်က အငတ်ဘေးဆိုက်မယ့် အခြေအနေရောက်နေတယ်လို့ သူကပြောပါတယ်။
မြန်မာစစ်တပ်ကို လေယာဉ်ဆီမရောင်းဖို့နဲ့ မြန်မာစစ်ခေါင်းဆောင်တွေ လူ့အခွင့်အရေးချိုးဖောက်နေပေမယ့် အပြစ်ပေးရေးယူခံနေရမှုကနေ ကင်းလွတ်ခွင့်ရနေတာ ရပ်တန့်ဖို့ နိုင်ငံတကာကိုတိုက်တွန်းထားပါတယ်။
