၁၉ ဩဂုတ်၊ ၂၀၂၄
ရခိုင်ပြည်နယ် မြောက်ပိုင်း၊ မောင်တောမြို့မှာ ဩဂုတ်လ ၁၅ ရက် ညနေပိုင်းက ဖြစ်ပွားခဲ့တဲ့ လူနေအိမ်တွေ မီးလောင်ပျက်စီးမှုအပါအဝင် မောင်တောမြို့သိမ်းတိုက်ပွဲတွေနဲ့ပတ်သတ်ပြီး အာရက္ခတပ်တော် – AA က ဩဂုတ်လ ၁၈ ရက် ညပိုင်းက သတင်းထုတ်ပြန်ပါတယ်။
ဒီသတင်းထုတ်ပြန်ချက်ထဲမှာ AA က မောင်တောမြို့ခံလူထုကို ဘေးလွတ်ရာကို ရှောင်တိမ်းထွက်ခွာဖို့ ဇွန်လ ၁၆ ရက်ထဲက အသိပေးထားပြီး ဖြစ်ကြောင်းနဲ့ ဩဂုတ်လ ၄ ရက်ကစပြီး မောင်တောမြို့သိမ်းတိုက်ပွဲစတင်တဲ့အနေ နဲ့ မြို့မြောက်ဘက်က ဟော်ရီတူလာရွာနဲ့ မောင်နီရွာက စစ်စခန်းတွေကို တိုက်ခိုက်ခဲ့ကြောင်း ၊ စစ်ကောင်စီတပ် တွေ က လူသားဒိုင်းအဖြစ် မြို့နေလူထုကို ထွက်ခွာခွင့်မပေးသလို တချို့ ARSA ၊ RSO ၊ ARA စတဲ့ အကြမ်း ဖက်အဖွဲ့အစည်းတွေနဲ့ ဆက်စပ်နေတဲ့ လူထုတွေလည်း မြို့ထဲမှာ ရှိနေကြောင်း ဖော်ပြထားပါတယ်။
မောင်တောမြို့တွင်းထိုးစစ်ဆင်တိုက်ခိုက်မှုတွေ အရှိန်အဟုန်မြင့်လုပ်ဆောင်ခဲ့တဲ့ အချိန်ကစပြီး မောင်တောမြို့ တွင်းမှာ ပိတ်မိနေတဲ့ နိုင်ငံတကာအဖွဲ့အစည်းတွေက ဝန်ထမ်းတွေနဲ့မိသားစုတွေအပါအဝင် မြို့ခံ လူဦးရေ ၂၀၀၀၀ ဝန်းကျင်ကို ကယ်ထုတ်နိုင်ပြီး ဆက်ပြီး ကယ်ထုတ်ဖို့လည်း ကြိုးစားနေတယ်လို့ AA က ဆိုပါတယ်။
ဩဂုတ်လ ၁၅ ရက်၊ ညနေ ၄ နာရီဝန်းကျင်မှာ မောင်တောမြို့အမှတ် ၂ ရပ်ကွက် အထက ၂ ကျောင်းအနီးက စစ်ကောင်စီအကြမ်းဖက်သင်တန်းဆင်းမူဆလင်လက်နက်ကိုင်အဖွဲ့ဝင်တချို့နဲ့ AA တပ်တော်တို့ကြားမှာ မိနစ် လေးဆယ်ကြာ ထိတွေ့တိုက်ပွဲတစ်ခု ဖြစ်ပွားခဲ့ပါတယ်။
တိုက်ပွဲအတွင်းမှာ အကြမ်းဖက်တပ်ဖွဲ့ဝင် မူဆလင်တချို့ ဟာ စခန်းချတဲ့ အဆောက်အအုံကို မီးရှို့ထွက်ပြေးသွား တဲ့အတွက် သူတို့တပ်စွဲထားတဲ့အဆောက်အအုံအပါအဝင် လူနေအိမ် ၅ လုံးလဲ မီးလောင် ပျက်စီးသွားတယ်လို့ AA က ဖော်ပြပါတယ်။
ဒီဖြစ်စဉ်မှာ မီးလောင်သေဆုံးသွားတဲ့မူဆလင် ရုပ်အလောင်း ၂ ခုနဲ့ လက်နက်တချို့ သိမ်းဆည်းရမိတယ်လို့ AA က ထုတ်ပြန်ပါတယ်။ မောင်တောမြို့သိမ်းတိုက်ပွဲအတွင်းမှာ ဖြစ်ပွားနေတဲ့ တိုက်ပွဲတွေနဲ့ပတ်သတ်ပြီး တချို့ သော သတင်းမှား ၊ သတင်းတုတွေဟာ အာရက္ခဒေသအတွင်း လူမျိုးနှစ်ခုအကြား သဟဇာတဖြစ်မှုကို ထိခိုက်စေနိုင်တယ်လို့ AA ရဲ့ သတင်းထုတ်ပြန်ချက်မှာ သတိပေးထားပါတယ်။
Photo-AA
ပုံစာ – (AA ဘက်က ထုတ်ပြန်တဲ့ မောင်တောမြို့အနီးတဝိုက်မြေပုံ)
