၁၉ ဖေဖော်ဝါရီ၊ ၂၀၂၅
စစ်ကိုင်းတိုင်း၊ မုံရွာမြို့နယ်အတွင်းက စစ်ဘေးရှောင်နေရာတစ်ခုကို စစ်ကောင်စီတပ်ဖွဲ့တင်တွေက လက်နက်ကြီးနဲ့ ပစ်ခတ်တာကြောင့် စစ်ရှောင်ပြည်သူတစ်ဦး နေရာမှာတင်ပွဲချင်းပြီးသေဆုံးခဲ့ပြီး ထိခိုက်ဒဏ်ရာရသူ ၃ ဦးထက်မနည်း ရှိခဲ့တယ်လို့ ဒေသတွင်းသတင်းရင်းမြစ်က ပြောဆိုပါတယ်။ ဖေဖော်ဝါရီ ၁၉ ရက် ဒီနေ့မနက် ၁၀နာရီ ၄၆ မိနစ်မှာ ခင်မွန်ဘက်စုံခြံဘက်က စစ်ကောင်စီတပ်စခန်းကလက်နက်ကြီးနဲ့ပစ်ခတ်ခဲ့တာ ဖြစ်တယ်လို့ ဒေသခံတွေက ပြောဆိုပါတယ်။
ဖေဖော်ဝါရီလ ၁၈ ရက်နေ့ ညနေ ၅ နာရီဝန်းကျင်ကလည်း မုံရွာခရိုင်၊ ချောင်းဦးမြို့နယ်၊ မြပုလဲစစ်တပ်ဂိတ်စခန်းက လက်နက်ကြီးနဲ့ ရွာတွေထဲကို ပစ်ခတ်တာကြောင့် ကျီကုန်းကျေးရွာမှ အပြစ်မဲ့ပြည်သူ (၂)ဦး နေရာမှာသေဆုံးခဲ့ပြီး အသက် (၅)နှစ်အရွယ် ကလေးတစ်ဦး၊ လူလတ်ပိုင်းအမျိုးသား (၁)ဦးနဲ့ လူလတ်ပိုင်းအမျိုးသမီး (၁)ဦးတို့ ထိခိုက်ဒဏ်ရာ ရရှိခဲ့ပါတယ်။
ဖေဖော်ဝါရီ ၁၈ ရက် နေ့လည် ၁၁ နာရီဝန်းကျင်မှာ ယင်းမာပင်ခရိုင်၊ ကနီမြို့နယ်၊ မုဌောရွာက ချင်းတွင်းမြစ်ကူးတို့ဆိပ်ကို လေကြောင်းက ပေါင် ၅၀၀ ဗုံးနှစ်လုံး ကြဲချကာ ဒုံးကျည်တွေနဲ့ပါပစ်ခတ်တိုက်ခိုက်ခဲ့ပြီး ဘုန်းကြီးတစ်ပါးနဲ့ ပြည်သူနှစ်ဦး ဒဏ်ရာရရှိခဲ့တယ်လို့ အစောပိုင်းသတင်းတွေအရ သိရပါတယ်။ လေကြောင်းတိုက်ခိုက်မှုကြောင့် ဆီအပြည့်ပါတဲ့ ခြောက်ဘီးကားနှစ်စီးလည်း ပျက်စီးခဲ့ပါတယ်။
ဖေဖော်ဝါရီ ၁၈ ရက် ညနေ ၅ နာရီဝန်းကျင်မှာပဲ ကနီမြို့နယ်၊ ချောင်းမအရှေ့ရွာကို စစ်ကောင်စီက စက်တပ်လေထီးများနဲ့ ၁၂၀ မမ ၄ လုံးကြဲချတိုက်ခဲ့တဲ့အတွက် ကလေးတစ်ဦးအပါအဝင် ဒေသခံအရပ်သားပြည်သူ ၅ ဦးသေဆုံးပြီး ၂၀ ကျော် ထိခိုက်ဒဏ်ရာရခဲ့တယ်လို့ သိရပါတယ်။
ပုံစာ – ကနီ မုဌောရွာကို လေကြောင်းတိုက်ခိုက်မှုကို အဝေးက မြင်ရစဉ်
ဓာတ်ပုံ – CJ
