၂၈ ဇန်နဝါရီ ၊၂၀၂၅
လာမယ့် ဖေဖော်ဝါရီလအတွင်းမှာ ကျင်းပပြုလုပ်မယ့် မန်းရွှေစက်တော်ရာဘုရားပွဲအတွက် အန္တရာယ်ရှိကြောင်း တော်လှန်ရေးတပ်ဖွဲ့တွေရဲ့ ပြောဆိုသတိပေးချက်ကို စစ်ကောင်စီဘက်က လုံခြုံရေးတိုးမြှင့်ထားတယ်လို့ ဘုရားဂေါပကတွေရဲ့ ပြောဆိုမှုအရ သိရပါတယ်။
ဒီပွဲတော်ကို ကျင်းပနိုင်ဖို့ စက်တော်ရာဘုရားနှစ်နေရာအနီးမှာ စစ်တပ်၊ ရဲတပ်ဖွဲ့ဝင်တွေက တပ်စွဲထားတယ်လို့ သိရပြီး ပွဲတော်နေရာဟာ အမ်း – ပဒန်းကားလမ်းနဲ့လည်း နီးစပ်နေပါတယ်။
မင်းဘူးအခြေစိုက် တော်လှန်ရေးတပ်ဖွဲ့တွေကတော့ မန်းစက်တော်ရာဘုရားပွဲကို မလာဖို့နဲ့ တိုက်ပွဲတွေ ရှိနိုင် တယ်လို့ ဇန်နဝါရီလ အစောပိုင်းက သတိပေးကြေညာချက်ထုတ်ပြန်ထားပါတယ်။ ဒါပေမယ့် ရွှေစက်တော် ဘုရားတာဝန်ရှိသူတွေကတော့ လုံခြုံတယ်လို့ တုံ့ပြန်ပြောဆိုပါတယ်။
” အောက်စက်တော်ရာမှာရော အထက်စက်တော်ရာမှာရော လုံခြုံရေးတိုးမြှင့်ထားတယ်။ အခုလက်ရှိထိတော့ တစ်စုံတစ်ရာတိုက်ပွဲမရှိဘူး။ အကြမ်းဖက်မှုမရှိဘူး။ အေးအေးချမ်းချမ်းလာရောက်ဖူးမြော်လို့ရပါတယ်” လို့ မန်းရွှေစက်တော်ဂေါပက ဥက္ကဌ ဦးအေးကိုက New Day Myanmar သတင်းဌာနကို ပြောဆိုထားပါတယ်။
ရွှေစက်တော်ဘုရားဟာ မင်းဘူးမြို့အနောက်တောင်ဘက် ၂၆ မိုင်ခန့်အကွာ စကုမြို့ရဲ့ အနောက်တောင်ဘက် ၁၆ မိုင်အကွာ အနောက်ရိုးမအရှေ့ဘက်ဆုံး တောင်စွယ်ပေါ် မှာတည်ရှိပြီး စက်တော်ရာဘုရားပွဲတော်ကို နှစ်စဉ် တပို့တွဲလဆန်း ၅ ရက်က မြန်မာနှစ်ဆန်း ၁ ရက်အထိ ကျင်းပလေ့ရှိပါတယ်။
အခုနှစ်မှာ ဆိုင်ခန်းပေါင်း ၄၀၀ ဝန်းကျင်နဲ့ လူနေ တည်းခိုဆောင် ၈၀၀ ဝန်းကျင် ဆောက်လုပ်ပေးသွားမယ်လို့ သိရပြီး ဘုရားပွဲတော်ကို လာမယ့် ဖေဖော်ဝါရီ ၂ ရက်ကနေ ဧပြီ ၁၇ ရက်အထိ ကျင်းပသွားမှာ ဖြစ်ကြောင်းနဲ့ တည်းခိုဆောင်ဈေးနှုန်းထားတွေကိုတော့ ထုတ်ပြန်ကြေညာတာမျိုး မရှိသေးပါဘူး။
