မန္တလေးမြို့၊ ပြည်ကြီးတံခွန်မြို့နယ်၊ (စ)ရပ်ကွက်၊ ၁၂၃ လမ်း ၁၂၄ လမ်းကြား ၅၄ (အေ) လမ်းက နေအိမ်တခုမှာ အောက်တိုဘာ ၁၁ ရက် နေ့လယ်ပိုင်းက ပေါက်ကွဲမှုတစ်ခု ဖြစ်ပွားခဲ့ပါတယ်။
နောင်ချိုမြို့နယ် ပြည်သူ့ဆေးရုံကြီးမှာ သန့်ရှင်းရေးပြုလုပ်ပြီးပြန်လာရာက သယ်ဆောင်လာခဲ့တဲ့ စွန့်ပစ်ပစ္စည်း သံတိုသံစများအထုတ်အတွင်းကနေ တရုတ်ကြိုးဆွဲလက်ပစ်ဗုံးလို့ ယူဆရတဲ့ ဗုံး ၁ လုံးရဲ့ ကြိုးစကို ဆွဲကြည့်မိရာ မီးခိုးထွက်ပြီး ယမ်းနံထွက်လာတာကြောင့် အဝတ်ရေစိမ်ထားတဲ့ ကော်ပုံးအတွင်း ပစ်ထည့်ခဲ့ရာ ပေါက်ကွဲမှုဖြစ်ပွားခဲ့တာလို့ ဆိုပါတယ်။
ပေါက်ကွဲမှုကြောင့် အသက် ၃ နှစ်အရွယ် မိန်းကလေးတဦးက နေရာမှာတင် သေဆုံးခဲ့ပြီး အမျိုးသမီးတဦးနှစ် ၅ နှစ်အရွယ် ကောင်လေးတဦး ဒဏ်ရာရရှိခဲ့တယ်လို့ သိရပါတယ်။
ပေါက်ကွဲမှုဖြစ်စဥ်နဲ့ပတ်သက်ပြီး နောင်ချိုဆေးရုံကနေ စွန့်ပစ်ပစ္စည်း သံတိုသံစများအထုတ်ကို သယ်ဆောင်လာတဲ့ ဖိုးလပြည့် (၃၁နှစ်) ကို ပြည်ကြီးတံခွန်မြို့နယ်၊ စက်မှုနယ်မြေရဲစခန်းမှာ ဆက်လက် စစ်ဆေးနေဆဲလို့ သိရပါတယ်။
