စစ်ကောင်စီအနေနဲ့ မန္တလေးမြို့ရှိ ရပ်ကွက်များမှ လူငယ်များကို စစ်မှုထမ်း အပတ်စဉ် ၁၂ အတွက် ဟုဆိုကာ အတင်းအကြပ် တပ်သားစုဆောင်းနေတယ်လို့ ဒေသခံတွေက New Day Myanmar ကိုပြောပါတယ်။
စစ်မှုထမ်း အပတ်စဉ် ၁၂ အတွက် မတ်လ ၂၄ ရက်က စတင်မဲနှိုက်ခိုင်းနေတာပဲဖြစ်ပါတယ်။
“အရင်တုန်းကလည်း မဲနှိုက်စနစ်နဲ့သွားတာ။ ဒါပေမယ့် ပိုက်ဆံရှိတဲ့သူတွေက လူစားထိုးထည့်တာပေါ့။ဘာအသံမှမထွက်ဘူး။ အခုကျတော့ လူစားထိုးလည်းမရတော့ဘူး။ အသည်းအသန်စာရင်းလိုက်ကောက်တယ်။ မဲနှုက်ခိုင်းတယ်။ မဲမနှိုက်ရင်လည်း သူတို့ပေါ်တာဆွဲတာခံရဦးမယ်။ အဆင်မပြေဘူး” လို့ မန္တလေးမြို့တွင်နေိုင်သူတစ်ဦးကပြောပါတယ်။
စစ်မှုထမ်း အပတ်စဉ် ၁၂ ကို လာမယ့် ဧပြီလမှာ စတင်မှာဖြစ်ပါတယ်။
၂၀၂၄ ခုနှစ် ဒီဇင်ဘာလ ၃၁ ရက်နေ့မှာ ပြည်သူ့စစ်မှုထမ်း တာဝန်ထမ်းဆောင်ရန် အကျုံးဝင်တဲ့ အမျိုးသားလူငယ်အားလုံးကို အပတ်စဉ် ၁၂ (၄/၂၀၂၅) တက်ရောက်ရန်အတွက် ပြည်သူ့စစ်မှုထမ်း နည်းဥပဒေများနဲ့အညီ မဲနှိုက်ရွေးချယ်သွားမှာဖြစ်တယ်လို့ သိရပါတယ်။
စစ်မှုထမ်းဖို့ မဲနှိုက်ရာမှာလည်း လူငယ်များကိုယ်တိုင် သို့မဟုတ် မိမိမိသားစုထဲမှ ကိုယ် စားလှယ်တစ်ဦးက လာရောက် မဲနှိုက်ဆောင် ရွက်ရမှာဖြစ်ပါတယ်။
သို့သော် လူငယ်(သို့မဟုတ်) မိဘများက လာရောက်မဲမနှိုက်ပါက စစ်မှုထမ်းဆင့်ခေါ်ရေးအဖွဲ့ဝင်တစ်ဦးဦးကမဲနှုက်သွားမှာဖြစ်တယ်လို့ သိရပါတယ်။
“စစ်မှုထမ်းကအကုန်လုံး မဖြစ်မနေထမ်းရမယ်ဆိုရင် သူတို့သားသမီးတွေပါထည့်လေ။ လူငယ်ရုပ်ရှင်သရုပ်ဆောင်တွေလည်းရှိတယ်။ အကုန်ခေါ်လေ။ မဆိုင်တဲ့လူငယ်တွေကိုကျတော့ သေလမ်းကိုပို့နေတာ။ သူတို့သားသမီးတွေကိုယ်တိုင်စစ်မှုထမ်းရင် မဲနှိုက်စရာတောင်မလိုဘူး။ ကိုယ့်အသိစိတ်ဓာတ်နဲ့ စာရင်းပေးလိုက်မယ်” လို့ လူငယ်တစ်ဦးက New Day Myanmar ကိုပြောပါတယ်။
ဓါတ်ပုံ – စစ်ကောင်စီ