မန္တလေးတိုင်းမှာ မြေငလျင်လှုပ်ရှားမှုဖြစ်အတွင်း မတ်လ ၃၁ ရက်နေ့အထိ လူ ၄၀၃ ဦးကို ကယ်ထုတ်ပေးနိုင်ခဲ့တယ်လို့ မြန်မာနိုင်ငံ မီးသတ်တပ်ဖွဲ့က သတင်းထုတ်ပြန်ထားပါတယ်။
မီးသတ်တပ်ဖွဲ့ရဲ့ မတ်လ ၃၁ ရက်နေ့အထိစာရင်းအရ ပျက်စီးနေတဲ့ အဆောက်အအုံတွေထဲကနေ လူ ၄၀၃ ဦးကို ကယ်ထုတ်ပေးနိုင်ခဲ့ပြီး လူ၂၅၉ ဦးရဲ့ ရုပ်အလောင်းများကို ထုတ်ယူနိုင်ခဲ့တယ်လို့ သိရပါတယ်။
ငလျင်လှုပ်ခတ်မှုကြောင့် အဆောက်အဦထိခိုက်ပျက်စီးမှုများကို မြန်မာနိုင်ငံမီးသတ်တပ်ဖွဲ့မှ ရှာဖွေကယ်ဆယ်ရေးတပ်ဖွဲ့ဝင်များ၊ တရုတ်နိုင်ငံမှ ရှာဖွေကယ်ဆယ်ရေးတပ်ဖွဲ့ဝင်များ၊ ရုရှားနိုင်ငံမှ ရှာဖွေကယ်ဆယ်ရေးတပ်ဖွဲ့ဝင်များနှင့် အိန္ဒိယနိုင်ငံမှ ရှာဖွေကယ်ဆယ်ရေးတပ်ဖွဲ့ဝင်များ ပူးပေါင်းပြီး ရှာဖွေကယ်ဆယ်ရေးလုပ်ငန်းတွေ ဆက်လက်လုပ်ဆောင်နေတယ်လို့ဆိုပါတယ်။
ဓါတ်ပုံ – MFSD