MDY-PDF အနေနဖြ့ ၎င်းတို့တပ်ဖွဲ့ကို လိုအပ်သလို ပဲ့ပြင်၊ ထိန်းကျောင်းရန်၊ တိုင်ကြားရန် ပြည်သူလူထုကို တောင်းဆိုလိုက်ပါတယ်။
၁၀၂၇ စစ်ဆင်ရေးရဲ့ ပထမပိုင်းနဲ့ ဒုတိယပိုင်း (ရှမ်း-မန်း စစ်ဆင်ရေး) တွေမှာလည်း မဟာမိတ်တော်လှန်ရေးအဖွဲ့အစည်းများနဲ့ ဟန်ချက်ညီညီ ပူးပေါင်းလက်တွဲပြီး စစ်ရေးလှုပ်ရှားမှုတွေ ဖော်ဆောင်နိုင်ခဲ့သလို မန္တလေးဒေသထဲမှာရှိတဲ့ စိုးမိုးထိန်းချုပ်နယ်မြေအချို့ကိုလည်း ဆုတ်ဆုတ်ကိုင်ကိုင် ရယူနိုင်ခဲ့ပြီလို့ ဆိုပါတယ်။
သို့သော် ဒီအခြေအနေကို ကျေနပ်တင်းတိမ်ရမှာမဟုတ်ဘဲ ပြည်သူ့နွေဦးတော်လှန်ရေးကြီးရဲ့ အန္တိမပန်းတိုင်ဖြစ်တဲ့ ဘုံရန်သူ အာဏာရှင်စနစ်ကို အပြီးတိုင် ချုပ်ငြိမ်းရေး၊ ဘုံပန်းတိုင်ဖြစ်တဲ့ ဖက်ဒရယ်ဒီမိုကရေစီ ပြည်ထောင်စု တည်ဆောက်ရေးတို့အထိ မဆုတ်မနှစ် ဆက်လက်ချီတက်ကြဖို့ တိုက်တွန်းထားပါတယ်။
ပြည်သူလူထုကို MDY-PDF အနေနဲ့ ၎င်းတို့တပ်ဖွဲ့ကို လိုအပ်သလို ပဲ့ပြင်၊ ထိန်းကျောင်းကြဖို့ အလေးအနက် ပန်ကြားထားပါတယ်။
MDY-PDF တပ်ဖွဲ့ဝင်တဦးဦးကဖြစ်စေ၊ တပ်ရင်း/တပ်ဖွဲ့/ဌာန တခုခုကဖြစ်စေ PDF စစ်သည်တော်တို့ လိုက်နာကျင့်ကြံရမယ့် “ကျင့်ဝတ်စည်းကမ်း” တွေ၊ တပ်ဖွဲ့က ချမှတ်ထားတဲ့ စည်းမျဉ်းစည်းကမ်းတွေကို ကျူးလွန်ချိုးဖောက်နေတာ မြင်ခဲ့၊ ကြုံခဲ့၊ ကြားခဲ့ရင် လူထုအနေနဲ့ တိုင်တန်းကြဖို့ အလေးအနက် ဖိတ်ခေါ်၊ ပန်ကြားထားပါတယ်။
တိုငိကြားမှုတွေကိုလည်း တပ်ဖွဲ့ရဲ့ စစ်ရေးရုံးတို့၊ ဗဟိုစည်းကမ်းထိန်းသိမ်းရေးအဖွဲ့တို့ကနေ လိုအပ်သလို စုံစမ်းစစ်ဆေးမှုတွေ လုပ်ဆောင်မှာဖြစ်ပြီး တွေ့ရှိချက်ပေါ် မူတည်ပြီး လိုအပ်တဲ့ အရေးယူမှုတွေကို ဆက်လက်ဆောင်ရွက်မယ်လို့ ဆိုပါတယ်။သတင်းပို့တိုင်ကြားကြတဲ့ မိဘပြည်သူများအနေနဲ့လည်း စုံစမ်းစစ်ဆေးရာမှာ လိုအပ်တဲ့ သက်သေသက္ကာယတွေ၊ အထောက်အထား အချက်အလက်တွေကို တတ်နိုင်သမျှ ကူညီပေးကြဖို့နဲ့ စုံစမ်းမေးမြန်းရာမှာ လိုအပ်လာရင် ပူးပေါင်းပါဝင်ပေးကြဖို့ကိုလည်း မေတ္တာရပ်ခံထားပါတယ်။
ရာနှုန်းပြည့် ပြီးပြည့်စုံတယ်လို့ မဆိုနိုင်ပေမယ့်MDY-PDF ကို အကောင်းဆုံးဖြစ်အောင် ကိုယ်စွမ်းဉာဏ်စွမ်းရှိသရွေ့ ကြိုးပမ်းတည်ဆောက်နေတယ်လို့ သိရပါတယ်။
MDY-PDF နဲ့ပတ်သတ်ပြီး တိုင်ကြားလိုတာ၊ လမ်းညွှန်လိုတာ၊ အကြံပြုလိုတာများ ရှိပါက Signal ၊ Telegram ၊ Email တွေသုံးဖို့ အခက်အခဲရှိသူများအနေနဲ့ ကျနော်တို့ တပ်ဖွဲ့ရဲ့ တရားဝင် Facebook စာမျက်နှာကနေတဆင့်လည်း ဆက်သွယ်နိုင်ကြတယ်လို့ ဆိုပါတယ်။
MDY-PDF ဟာ အမျိုးသားညီညွတ်ရေးအစိုးရ (NUG)၊ ကာကွယ်ရေးဝန်ကြီးဌာန (MOD) ရဲ့ ကွပ်ကဲမှုအောက်မှာရှိတဲ့ ပြည်သူ့ကာကွယ်ရေးတပ်မတော် (PDF) ရဲ့ အစိတ်အပိုင်းတခု ဖြစ်ပါတယ်။
ဓာတ်ပုံ – ပြည်သူ့ကာကွယ်ရေးတပ်မတော် (မန္တလေး)
