စစ်ကောင်စီအနေနဲ့ ပြည်ပထွက်ခွာခွင့်ကို ပညာတော်သင်ဗီဇာတစ်ခုတည်းဖြင့်သာ လေဆိပ်ကနေ ထွက်ခွာခွင့်ပြုနေတာဖြစ်တယ်လို့ သိရပါတယ်။
စစ်မှုထမ်းအကျုံးဝင်တဲ့ အမျိုးသားတွေရဲ့စာရင်းတွေကို သက်ဆိုင်ရာလေဆိပ်အသီးသီးကို စာရင်းပေးပို့ထားပြီးဖြစ်ပါတယ်။
“အခုနေပြည်တော်လေဆိပ်ရယ်၊ ရန်ကုန်လေဆိပ်ရယ်မှာ နည်းပညာမြင့်ဆော့ဝဲတစ်ခုတပ်ဆင်ထားတယ်။ ပတ်စ်ပို့ကို Scan ဖတ်လိုက်တာနဲ့ သူကထွက်ခွာလို့ရလား၊မရဘူးလားဆိုတာ ကွန်ပျူတာမှာတစ်ခါတည်းတန်းပေါ်တယ်။ အထူးသဖြင့် ပညာရေးဗီဇာပဲလေဆိပ်ကနေ ထွက်ခွာခွင့်ပြုတယ်။ ကျန်တဲ့ဟာတွေဆိုရင် ပေးမထွက်ဘူး။ အမျိုးသမီးရသေးတယ်။ ကျောင်းသားတွေရသေးတယ်။ အမျိုးသားတွေကို လုံးဝပေးမထွက်ဘူး” စစ်ကောင်စီအရာရှိတစ်ဦးက ပြောပါတယ်။
ယခင်က လေဆိပ်ကနေထွက်ခွာခွင့်ရဖို့အတွက် လေဆိပ်က တာဝန်ရှိသူတွေကို တစ်ဦးလျှင် သိန်း ၂၀ ပေးရတာဖြစ်ပါတယ်။
ယခုအခါမှာတော့ ပိုက်ဆံပေးပြီးထွက်ခွင့်မရှိတော့ဘူးလို့ ၎င်းကဆက်လက်ရှင်းပြပါတယ်။
“အရင်က တစ်ယောက်ကို သိန်း ၂၀ ပေါက်တယ်။ ပိုက်ဆံပေးရင် သွားလို့ရပြီပေါ့။ အခုကတော့ ပိုက်ဆံပေးရင်တောင် မရတော့ဘူး” လို့ ၎င်းကဆိုပါတယ်။
စစ်မှုထမ်းရန် အကျုံးဝင်တဲ့ အသက် ၁၈ နှစ်ကနေ ၃၅ နှစ်အထိအမျိုးသားတွေကို ပြည်ပထွက်ခွာခွင့်ပိတ်ထားသလို MoU စနစ်နဲ့အလုပ်သွားရောက်လုပ်ကိုင်မည်ဆိုပါက စစ်ကောင်စီအလုပ်သမားဝန်ကြီးဌာနရဲ့ ခွင့်ပြုချက်ကို ရယူရမှာဖြစ်ပါတယ်။
Photo – EPA
