၂၀ မတ်၊ ၂၀၂၅
ပြည်ပဖုန်းနံပါတ်တွေနဲ့ ဖွင့်ထားတဲ့ KBZ Pay အကောင့်တွေကို အသုံးပြုခွင့်ရပ်ဆိုင်းသွားမယ်လို့ KBZ Pay ကထုတ်ပြန်ထားပါတယ်။
လက်ရှိ မူဝါဒ ပြောင်းလဲမှုတွေအရ KBZ Pay အကောင့်ကို ပြည်တွင်းဖုန်းနံပါတ်နဲ့သာ အသုံးပြုနိုင်တော့မှာ ဖြစ်တဲ့ အတွက် KBZ Pay အသုံးပြုသူတွေအနေနဲ့လည်း ပြည်ပဖုန်းနံပါတ်ကို ပြည်တွင်းဖုန်းနံပါတ် တစ်ခုခု နဲ့ ပြောင်းလဲ အသုံးပြုဖို့ တိုက်တွန်းထားပါတယ်။
မတ်လ ၁၉ ရက်ကစပြီး ထိုင်းဖုန်းနဲ့ ဖွင့်လှစ်အသုံးပြုနေတဲ့ KBZ Pay အကောင့်တွေကိုလည်း ငွေလွှဲဝန်ဆောင် မှုယာယီဆိုင်းငံ့ထားမှာဖြစ်တယ်လို့ ဆိုပါတယ်။
မြန်မာဖုန်းနံပါတ်နဲ့ပြောင်းလဲအသုံးပြုဖို့ KBZ Pay အပလီကေးရှင်းထဲမှာရှိတဲ့ ဖုန်းနံပါတ်ပြောင်း Function မှာ လုပ်ဆောင်ရမယ့် အဆင့်တစ်ခုချင်းစီကို လိုက်နာပြီး လွယ်ကူစွာ ပြောင်းလဲနိုင်မှာ ဖြစ်သလို ဖုန်းနံပါတ် ပြောင်းလဲနိုင်ဖို့အတွက်ကိုလည်း ထွက်ရှိလာမယ့် ဗားရှင်းအသစ်ကို အဆင့်မြှင့်တင်ထားရမှာဖြစ်ပါတယ်။
ဗားရှင်းအသစ်မထွက်ခင် မြန်မာ ဖုန်းနံပါတ်ပြောင်းလဲဖို့ Virtual Customer Support နဲ့ ဘွတ်ကင်ပြုလုပ်ပြီး ဝန်ဆောင်မှု ရယူနိုင်တယ်လို့ သိရပါတယ်။
ပုံစာ- KBZ Call centre မှ KBZ Pay အသုံးပြုသူများအား အသိပေးကြောင်းကြားထားပုံ
ဓာတ်ပုံ – KBZ
