ငလျင်ကြောင့် နေပြည်တော်က ဝန်ထမ်းလိုင်းခန်းတွေ ပြိုကျခဲ့လို့ လမ်းဘေးတွေမှာ တာလပတ်နဲ့ နေရတဲ့ ဝန်ထမ်းတွေကို မြို့အင်္ဂါရပ်နဲ့မကိုက်ညီတဲ့အတွက် မူလနေထိုင်ရာ ဝန်ထမ်းအိမ်ရာကို ပြန်လည်ရွှေ့ခိုင်းထားတယ်လို့ ဝန်ထမ်းတွေဆီကနေ သိရပါတယ်။
အင်အားပြင်းငလျင်ကြောင့် စစ်ကောင်စီရုံးစိုက်ရာနေပြည်တော်မှာ ထိခိုက်ပျက်စီးဆုံးရှုံးမှုများပြားခဲ့ရာမှာ သမ္မတအိမ်တော်တွေ၊ လွှတ်တော်တွေ၊ ဝန်ကြီးဌာနရုံးတွေ၊ ဝန်ထမ်းအိမ်ရာတွေ ပြိုကျပျက်စီးခဲ့တာဖြစ်ပါတယ်။
ဝန်ထမ်းအိမ်ရာတွေပြိုကျပျက်စီးသွားတဲ့အတွက် Non – CDM ဝန်ထမ်းတွေဟာ လမ်းဘေးတွေမှာအဆင်ပြေသလိုနေရပြီး စစ်ကောင်စီက ကူညီထောက်ပံ့တာတွေ မရှိဘူးလို့ဆိုပါတယ်။
“အဓိကလမ်းဘေးတွေမှာ တာလပတ်ကာပြီးနေနေရတော့ အမြင်မသင့်ဘူး။ နိုင်ငံတကာကလာတဲ့ လူတွေရှိတော့ မသင့်တော်ဘူး။ မြို့အင်္ဂါရပ်နဲ့မညီလို့ ပြန်ရွှေ့ခိုင်းတယ်။ မပြိုသေးတဲ့အိမ်ရာတွေမှာ နေခိုင်းထားတယ်” လို့ သာသနာရေးနဲ့ဝန်ကြီးဌာနက Non – CDM ဝန်ထမ်းက New Day Myanmar ကိုပြောပါတယ်။
နေပြည်တော်မှာ ငလျင်ကြောင့် ဝန်ထမ်းအိမ်ရာ ၁,၅၀၀ ကျော်မှာ ၁၁၆ လုံး ပြိုကျ ပျက်စီးခဲ့ပြီး ၅၀၇ လုံးမှာ အက်ကွဲကြောင်းရာတွေဖြစ်ပေါ်ခဲ့ပါတယ်။ လက်ရှိမှာလည်း နေပြည်တော်ကို အသစ်ပြန်လည်တည်ဆောက်ဖို့ မူလတည်ဆောက်ခဲ့တဲ့ ဆောက်လုပ်ရေးလုပ်ငန်းရှင်တွေကို စစ်ကောင်စီကဆင့်ခေါ်ထားပါတယ်။
