၉ ဖေဖော်ဝါရီ ၂၀၂၆

ဖေဖော်ဝါရီ ၈ ရက်ကကျင်းပခဲ့တဲ့ ထိုင်းနိုင်ငံ အထွေထွေရွေးကောက်ပွဲမှာ ဝန်ကြီးချုပ် အနုတင် ချာန်ဝီရာကူးလ် ဦးဆောင်တဲ့ ဘွန်ဂျိုင်ထိုင်းပါတီက အံ့အားသင့်ဖွယ် အနိုင်ရရှိခဲ့ပြီးနောက် ဖေဖော်ဝါရီ ၉ ရက်မှာ ညွန့်ပေါင်းအစိုးရ ဖွဲ့ရေးဆွေးနွေးမှုတွေ စတင်လုပ်ဆောင်ဖို့ ပြင်ဆင်နေတယ်လို့ သိရပါတယ်။

လက်ရှိ ထုတ်ပြန်ထားတဲ့ မဲရလဒ်တွေအရ ဘွန်ဂျိုင်ထိုင်းပါတီဟာ အောက်လွှတ်တော် အမတ်နေရာ ၅၀၀ အနက် ၂၀၀ နီးပါး အနိုင်ရထားပြီး အခြားပါတီတွေထက် အသာစီးရရှိထားပေမယ့် အစိုးရတစ်ပါတီတည်း ဖွဲ့နိုင်ဖို့တော့ အနည်းငယ် မပြည့်စုံသေးပါဘူး။

မဲရလဒ်ခန့်မှန်းချက်တွေအရ နေရာအများဆုံး အနိုင်ရမယ်လို့ မျှော်လင့်ထားကြတဲ့ ပြုပြင်ပြောင်းလဲရေးလိုလားတဲ့ ပြည်သူ့ပါတီက အမတ်နေရာ ၁၀၀ ကျော်နဲ့ ဒုတိယနေရာမှာ ရပ်တည်ခဲ့ပြီး၊ ဝန်ကြီးချုပ်ဟောင်း သက်ဆင် ရှင်နာဝပ်နဲ့ ဆက်နွယ်တဲ့ ဖွေထိုင်းပါတီကတော့ တတိယနေရာမှာ ကျန်ရစ်ခဲ့ပါတယ်။

ဖွေထိုင်းပါတီဟာ ယခင်က ဘွန်ဂျိုင်ထိုင်းပါတီနဲ့ မဟာမိတ်အဖြစ် အစိုးရဖွဲ့စည်းခဲ့ဖူးတာကြောင့် လက်ရှိ အနုတင် ဦးဆောင်မယ့် ညွန့်ပေါင်းအစိုးရထဲ ပါဝင်လာနိုင်တယ်လို့ နိုင်ငံရေးလေ့လာသူတွေက သုံးသပ်ကြပါတယ်။

မဲရေတွက်မှု ၉၀ ရာခိုင်နှုန်းပြီးစီးချိန်အထိ ခန့်မှန်းချက်အရ ဘွန်ဂျိုင်ထိုင်းပါတီက အမတ်နေရာ ၁၉၄ နေရာ ရရှိမယ်လို့ ခန့်မှန်းထားပြီး ပြည်သူ့ပါတီကတော့ ၁၁၆ နေရာနဲ့ ဒုတိယနေရာမှာ ရှိနေပါတယ်။

ပြည်သူ့ပါတီ ခေါင်းဆောင် နတ်သဖုန်း ရောင်ပညာဝပ်ကတော့ ဘွန်ဂျိုင်ထိုင်းပါတီက အစိုးရဖွဲ့နိုင်ပါက သူတို့ပါတီအနေနဲ့ အတိုက်အခံအဖြစ် ဆက်လက်တာဝန်ယူသွားမယ်လို့ ပြောကြားခဲ့ပါတယ်။

ထိုင်းနိုင်ငံမှာ ညွန့်ပေါင်းအစိုးရတွေ မကြာခဏ ပြိုကွဲခဲ့ပြီး သုံးနှစ်အတွင်း ဝန်ကြီးချုပ် သုံးဦးအထိ ပြောင်းလဲခဲ့ရတဲ့ နိုင်ငံရေးမတည်ငြိမ်မှုတွေကြောင့် ယခုရွေးကောက်ပွဲကို ခေါ်ယူခဲ့တာဖြစ်ပါတယ်။

ယခုရွေးကောက်ပွဲရလဒ်အရ ပြုပြင်ပြောင်းလဲရေးလိုလားတဲ့ အင်အားစုတွေဟာ လောလောဆယ် အတိုက်အခံအဖြစ်သာ ဆက်လက် ရပ်တည်ရမယ့် အခြေအနေကို ရောက်ရှိသွားခဲ့ပါတယ်။

#ထိုင်းရွေးကောက်ပွဲ

#ဘွန်ဂျိုင်ထိုင်းပါတီ

#အနုတင်ချာန်ဝီရာကူးလ်

#ညွန့်ပေါင်းအစိုးရ

#ထိုင်းနိုင်ငံရေး

#ပြည်သူ့ပါတီ

#ဖွေထိုင်းပါတီ

#အာဏာရေးအပြောင်းအလဲ

#ဒေသတွင်းနိုင်ငံရေး

#NewDayMyanmar