၂၅ မတ်၊ ၂၀၂၅

ထိုင်းနိုင်ငံတွင် ကျင်းပမယ့် ဘင်္ဂလားပင်လယ်အော်ဒေသအတွင်း ကဏ္ဍစုံနည်းပညာနဲ့ စီးပွားရေး ပူးပေါင်းဆောင်ရွက်ရေး ဦးဆောင်ဦးရွက်ပြုမှုအစီအစဥ် – ဘင်းမ်စတက် (BIMSTEC) ထိပ်သီးဆွေးနွေးပွဲကို စစ်ခေါင်းဆောင် မင်းအောင်လှိုင်တက်ရောက်ဖို့ ထိုင်းနိုင်ငံခြားရေးဝန်ကြီးဌာနက အတည်မပြုသေးဘူးလို့ သိရပါတယ်။

CNA သတင်းဌာနရဲ့ ထိုင်းအခြေစိုက် သတင်းထောက် Saksith Saiyasombut က ထိုင်းနိုင်ငံ၊ နိုင်ငံခြားရေးဝန်ကြီးဌာနကို မေးမြန်းရာမှာ နိုင်ငံခြားရေးဝန်ကြီးဌာနက စစ်ခေါင်းတောင် မင်းအောင်လှိုင် တက်ရောက်ဖို့ အတည်မပြုနိုင်သေးကြောင်း ပြန်လည်ဖြေကြားခဲ့တယ်လို့ မတ်လ ၂၄ ရက်နေ့မှာ သတင်းထောက် Saksith Saiyasombut က သူ့ရဲ့ X လူမှုကွန်ရက်မှာရေးသားထားပါတယ်။

ယခုနှစ် ထိုင်းနိုင်ငံက ဦးဆောင်ကျင်းပမယ့် ဘင်းမ်စတက် (BIMSTEC) ထိပ်သီးမှာ အဖွဲ့ဝင်နိုင်ငံတွေရဲ့ ခေါင်းဆောင်အားလုံးကို တရားဝင်အဖြစ် ဖိတ်ကြားလွှာပေးပို့ရမှာဖြစ်ပေမယ့် ထိုင်းနိုင်ငံခြားရေးဝန်ကြီးဌာက စစ်ခေါင်းဆောင်မင်းအောင်လှိုင် တက်ရောက်မယ့် အကြောင်း အတည်မပြုနိုင်သေးဘူးလို့ ပြောဆိုလိုက်တာဖြစ်ပါတယ်။

ဘင်းမ်စတက် (BIMSTEC) ထိပ်သီးမှအိမ်ရှင်အဖြစ် လက်ခံကျင်းပမယ့် ထိုင်းနိုင်ငံအနေဖြင့် ဘန်ကောက်မြို့မှာ ဧပြီလ ၃ ရက်နေ့မှ ၄ ရက်နေ့အထိ ကျင်းပရန် စီစဥ်ထားပြီး စစ်ခေါင်းဆောင် မင်းအောင်လှိုင်တက်မယ်လို့ သတင်းတွေ ထွက်ပေးနေတာဖြစ်ပါတယ်။

BIMSTEC အဖွဲ့ဟာ ၂၀၂၁ ခုနှစ်၊ ဖေဖော်ဝါရီလ ၁ ရက်နေ့ အာဏာသိမ်းကြိုးပမ်းမှုနောက်ပိုင်းမှာ တရားမဝင် မြန်မာစစ်အုပ်စုနှင့် ထိတွေ့ဆက်ဆံခဲ့ပြီး ၂၀၂၁ ခုနှစ်၊ ဇွန်လတွင် BIMSTEC အထိမ်းအမှတ်နေ့အတွက် ခေါင်းဆောင်တွေထံက သတင်းစကားကို BIMSTEC အတွင်းဝန်ရုံးက ထုတ်ပြန်ခဲ့ရာ၊ စစ်ခေါင်းဆောင် မင်းအောင်လှိုင်က “လေးစားအပ်ပါသော မြန်မာနိုင်ငံ၊ နိုင်ငံတော်စီမံအုပ်ချုပ်ရေးကောင်စီဥက္ကဌ” ဟု သူ့ကိုယ်သူ ရည်ညွှန်းသုံးစွဲပေးပို့တဲ့ သတင်းစကားပါဝင်ခဲ့တယ်လို့ Justice For Myanmar က သတင်းထုတ်ပြန်ပါတယ်။

အဲ့ဒီနောက်မှာလည်း BIMSTEC ဟာ စစ်အုပ်စုရဲ့ နိုင်ငံခြားရေးဝန်ကြီးကို ၂၀၂၂ ခုနှစ်က သီရိလင်္ကာနိုင်ငံမှာ ကျင်းပခဲ့တဲ့ ထိပ်သီးဆွေးနွေးပွဲသို့ တက်ရောက်ခွင့်ပြုခဲ့သလို ၂၀၂၄ ခုနှစ်တွင် ၄ ကြိမ်မြောက် BIMSTEC နိုင်ငံတော် လုံခြုံရေးအကြီးအကဲများ အစည်းအဝေးကို မြန်မာစစ်တပ်ကို အိမ်ရှင်အဖြစ် လက်ခံကျင်းပရန် ခွင့်ပြုပေးခဲ့တယ်လို့ သိရပါတယ်။

BIMSTEC အဖွဲ့ဝင်နိုင်ငံတွေက အိန္ဒိယ၊ နီပေါ၊ ဘူတန်၊ ဘင်္ဂလားဒေ့ရှ်၊ မြန်မာ၊ ထိုင်းနှင့် သီရိလင်္ကာတို့ ဖြစ်ပြီး ၁၉၉၇ ခုနှစ်တွင် ဘန်ကောက်မြို့မှာ စတင်တည်ထောင်ခဲ့တာဖြစ်ပါတယ်။

ပုံစာ – စစ်ခေါင်းဆောင် မင်းအောင်လှိုင်နဲ့ ထိုင်းဝန်ကြီးချုပ် ပေထောင်တန် ရှင်နာထပ်ထရာကိုတို့ ၂၀၂၄ ခုနှစ် နိုဝင်ဘာလက ကူမင်းမြို့ဟိုတယ်တခုရှိ Meeting တွင် အတူတွေ့ရစဉ်

ဓါတ်ပုံ – AFP