၂၅ မတ်၊၂၀၂၅

ထိုင်းနိုင်ငံမှာ ကျင်းပမယ့် ဘင်္ဂလားပင်လယ်အော်ဒေသအတွင်း ကဏ္ဍစုံနည်းပညာနှင့် စီးပွားရေး ပူးပေါင်း ဆောင်ရွက်ရေး ဦးဆောင်ဦးရွက်ပြုမှုအစီအစဥ် – ဘင်းမ်စတက် (BIMSTEC) ထိပ်သီးဆွေးနွေးပွဲကို စစ်ခေါင်း ဆောင် မင်းအောင်လှိုင် မတက်ရောက်စေရန် အခိုင်အမာရပ်တည် တားဆီးသွားမယ်လို့ လူ့အခွင့်အရေးလှုပ်ရှား မှုအဖွဲ့တစ်ခုဖြစ်တဲ့ justice For Myanmar က ဒီကနေ့မှာထုတ်ပြန်ပါတယ်။

BIMSTEC အနေနဲ့ မြန်မာတစ်နိုင်ငံလုံး မြန်မာစစ်တပ်မှ လေကြောင်း၊ရေကြောင်း၊လက်နက်ကြီးတွေနဲ့ တိုက် ခိုက်နေမှုအပေါ် တားဆီးဆောင်ရွက်တာမျိုးမရှိဘဲ စစ်ခေါင်းဆောင်ဦးဆောင်သည့် နိုင်ငံတကာပွဲများ ကျင်းပပြု လုပ်နိုင်ရန် လုပ်ဆောင်ပေးခဲ့တယ်လို့ JFM က ထောက်ပြပြောဆိုထားပါတယ်။

ဆက်လက်ပြီး BIMSTEC မှာ မြန်မာစစ်အုပ်စု ပါဝင်ခွင့်ရရှိနေမှုမှာ ၎င်းတို့အတွက် စွမ်းဆောင်ရည်မြှင့်တင်ရန်၊ နိုင်ငံတကာတရားဝင်မှုရရှိရေး ကြိုးပမ်းရန်၊ ဝါဒဖြန့်ချိရေးအတွက် အကြောင်းအရာဖန်တီးရန်၊ BIMSTEC အဖွဲ့ဝင်နိုင်ငံတွေနဲ့ နှစ်နိုင်ငံဆက်ဆံရေးတွေ တိုးမြှင့်ဆောင်ရွက်ဖို့အတွက် အထောက်အပံ့ ဖြစ်စေခဲ့တယ်လို့ လည်း ဆိုပါတယ်။

BIMSTEC နဲ့ အဖွဲ့ဝင်နိုင်ငံတွေအနေနဲ့ မြန်မာစစ်တပ်ရဲ့ ရက်စက်ကြမ်းကြုပ်တဲ့ ရာဇဝတ်မှုကြီးတွေမှာ ယခုလို ဂုဏ်သိက္ခာထိခိုက်ဖွယ်ရာ ကြံရာပါပတ်သက်မှုကို ရပ်တန့်ရမှာဖြစ်ကြောင်းနဲ့ အစည်းအဝေးကို စစ်ခေါင်းဆောင် တက်ရောက်မယ့် အစီအစဥ်မှာ မြန်မာပြည်သူတို့ရဲ့ လူ့အခွင့်အရေး နဲ့ ဒီမိုကရေစီမျှော် မှန်းချက်တွေအပေါ် ပြောင်ပြောင်တင်းတင်း စော်ကားမှုတစ်ရပ်ပင်ဖြစ်တယ်လို့လည်း JFM က ဆိုထားပါတယ်။

BIMSTEC အဖွဲ့ကို ၁၉၉၇ ခုနှစ်တွင် ဘန်ကောက်မြို့မှာဖွဲ့စည်းခဲ့တာဖြစ်ပြီး အဖွဲ့ဝင်နိုင်တွေအနေနဲ့ အိန္ဒိယ၊ နီပေါ၊ ဘူတန်၊ ဘင်္ဂလားဒေ့ရှ်၊ မြန်မာ၊ ထိုင်း နဲ့ သီရိလင်္ကာနိုင်ငံတို့ဖြစ်ကြပြီး ဘင်္ဂလားပင်လယ်အော်ဒေသ အိမ်နီးချင်း နိုင်ငံများအကြား စီးပွားရေးပူးပေါင်းဆောင်ရွက်မှုများ မြှင့်တင်ဆောင်ရွက်ဖို့ ဖွဲ့စည်းခဲ့တာလည်းဖြစ်ပါတယ်။

ဓာတ်ပုံ – JFM