၁၉ ဇန်နဝါရီ ၂၀၂၆
ထိုင်းနိုင်ငံ ချာချင်ဆောင်ခရိုင်မှာ အလုပ်ကနေပြန်လာတဲ့ လက်ထပ်ခါနီး ချစ်သူစုံတွဲနှစ်ဦးကို ထိုင်းနိုင်ငံသားတစ်ဦးက အနောက်ကနေ ကားနဲ့ဝင်တိုက်မှုဖြစ်ပွား ခဲ့ပြီး၊ အမျိုးသားဖြစ်သူမှာ နေရာမှာဘဲပွဲချင်းပြီး သေဆုံးခဲ့ရတယ်လို့ သိရပါတယ်။
အဲ့ဒီဖြစ်စဉ်ဟာ မနေ့က ဇန်နဝါရီ ၁၈ ရက် ည ၈ နာရီကျော်အချိန်မှာ ဖြစ်ပွားခဲ့တာဖြစ်ပြီးတော့ မိန်းကလေးဖြစ်သူဟာ ပေါင်ရိုးကျိုးဒဏ်ရာရရှိခဲ့တာကြောင့် ဆေးရုံမှာ ဆေးကုသခံနေရတယ်လို့ ထိုင်းရောက်မြန်မာလုပ်သားကူညီစောင့်ရှောက်ရေးကော်မတီဆီက နေသိရပါတယ်။
လတ်တလောမှာ ပြစ်မှုကျူးလွန်တဲ့ ထိုင်းနိုင်ငံသားဟာ ကားကိုထားခဲ့ပြီး ထွက်ပြေးတိမ်းရှောင်နေဆဲဖြစ်သလို အဲဒီအမှုအတွက် ပြီးဆုံးသည်အထိ ကူညီပံ့ပိုးပေးသွားမယ်လို့ MHAC မဟာမိတ်အဖွဲ့ ဦး ဆောင်သူ ကိုရဲမင်းက ဆိုပါတယ်။
သေဆုံးသူဟာ အသက် ၃၆နှစ်အရွယ် ကိုသော်သော်လင်း ဆိုသူဖြစ်ပြီး၊ ချစ်သူမိန်းကလေးရှိရာ ချာချင်ဆောင်ခရိုင်ကို ရောက်ရှိနေတာဟာ ၆ ရက်သာရှိသေးပြီး ၆ ရက်မြောက်နေ့မှာဘဲ မိန်းကလေးကို အလုပ်ကနေကြိုပြီးအပြန် ယာဉ်တိုက်ခံလိုက်ရတာဖြစ်တယ်လို့ သိရပါတယ်။
ပုံစာ – ချစ်သူစုံတွဲကို ဝင်တိုက်ခဲ့သော ကားကို တွေ့ရစဉ်
ဓာတ်ပုံ- အေအေစီရဲမင်း
