နိုင်ငံအဝှမ်းစစ်ရှုံးနေပြီး တပ်သားလိုအပ်ချက်များနေတဲ့ စစ်ကောင်စီတပ်ရဲ့ စစ်ခေါင်းဆောင်မင်းအောင်လှိုင်က လူငယ်တွေ အနေနဲ့ ပြည်ပကို သွားရောက်လုပ်ကိုင်တာထက် ဘဝလုံခြုံမှုရှိတဲ့ ပြည်တွင်းမှာပဲ အလုပ်လုပ်ကြဖို့ ပြောလိုက်ပါတယ်။
မတ်လ ၂၅ ရက်က နေပြည်တော် ပြုလုပ်ခဲ့တဲ့ စစ်ကောင်စီအစည်းအဝေးမှာ စစ်ခေါင်းဆောင်က အခုလိုပြောလိုက်တာဖြစ်ပါတယ်။ ဒါ့အပြင် သူက လူငယ်တွေ ပြည်ပကို သွားရောက်အလုပ်လုပ်ကိုင်မှုတွေကြောင့် ပြည်တွင်းမှာ အလုပ်သမားရှားပါးမှုတွေ ဖြစ်ပေါ်နေတယ်လို့ လည်းပြောပါတယ်။
မြန်မာနိုင်ငံမှာတော့ စစ်ရှုံးနေတဲ့ စစ်ကောင်စီဟာ စစ်မှုထမ်းဥပဒေက အသက်သွင်းပြီးချိန်ကစလို့ လူငယ်အများအပြားကို စစ်မှုထမ်းစေဖို့ အဓမ္မဖမ်းဆီးမှုတွေ ဆက်တိုက်ပြုလုပ်နေပြီး လူငယ်တွေ အကြားစိုးရိမ်မှုတွေနဲ့ နေထိုင်နေကြရတာဖြစ်ပါတယ်။
“ပြည်ပထွက် အလုပ်မလုပ်ဖို့ ပြောနေတာ သူ့ အတွက် သေပေမယ့် စစ်သားတွေ လိုချင်လို့ ပြောတဲ့ စကားပေါ့ဗျာ။ နေရာတိုင်းမှာ စစ်ရှုံးနေတော့ စစ်မှုထမ်းဖို့ လူငယ်တွေ အတင်းလိုက်ဖမ်းပြီး တပ်ထဲဆွဲထည့်နေတာ မြင်နေရတာပဲ။”လို့ ရန်ကုန်မြို့နေ ပြည်သူတဦးက New Day Myanmar ကိုပြောပါတယ်။
စစ်ကောင်စီဟာ ပြည်ပထွက်ခွာ အလုပ်လုပ်ကိုင်မယ့် လူငယ်တွေကို ပြည်ပထွက်ခွာခွင့် ပိတ်ပင်တာတွေလည်း ဆက်တိုက်ပြုလုပ်နေပါတယ်။ လက်ရှိအချိန်မှာလည်း စစ်မှုထမ်း အပတ်စဉ် ၁၂ အထိရှိနေပြီး လူငယ်တပ်သားသစ်တွေကို စုဆောင်းကာရှေ့တန်းပို့နေတာဖြစ်ပါတယ်။
စစ်ကောင်စီရဲ့ထုတ်ပြန်ချက်တွေအရ မြန်မာနိုင်ငံမှာ စစ်မှုထမ်းဖို့ အကျုံးဝင်သူ အမျိုးသား ၆ ဒသမ ၃ သန်း၊ အမျိုးသမီး ၇ဒသမ ၇ သန်း စုစုပေါင်း ၁၄ သန်းနီးပါး ရှိတယ်လို့ သိရပါတယ်။
ပုံစာ – စစ်မှုထမ်း ဥပဒေနဲ့ တပ်သားသစ်စုဆောင်းခံရသူများ
ဓါတ်ပုံ – စစ်ကောင်စီ
