ငလျင်ဒဏ်ကြောင့် ထိခိုက်ခံစားနေရတဲ့ တနိုင်ငံလုံးက ပြည်သူလူထုကို စာနာထောက်ထားပြီး ဧပြီ ၂ ရက်မှ ဧပြီ ၂၂ ရက်အထိ တနိုင်ငံလုံးအတိုင်းအတာနဲ့ အပစ်အခတ် ရပ်စဲသွားမယ်လို့ စစ်ကောင်စီရဲ့ တပ်မတော်ကာကွယ်ရေးဦးစီးချုပ်ရုံးက ဒီနေ့ ဧပြီ ၂ ရက် ညဘက်မှာ ထုတ်ပြန်ကြေညာလိုက်ပါတယ်။
စစ်ကောင်စီရဲ့ ထုတ်ပြန်ချက်ထဲမှာ မတ်လ ၂၈ ရက်မှာ ဖြစ်ပွားတဲ့ အင်အားပြင်းထန်တဲ့ ငလျင်ဒဏ်နဲ့ နောက်ဆက်တွဲငလျင်ငယ်တွေရဲ့ ဒဏ်ကြောင့် ပြည်သူတွေထိခိုက်သေဆုံးခဲ့ပြီး လမ်းတံတားနဲ့ အဆောက်အအုံတွေ ထိခိုက်ပျက်စီးမှုတွေ ဖြစ်ပွားခဲ့တဲ့အတွက် ထိခိုက်ခံစားနေရတဲ့ တနိုင်ငံလုံးက ပြည်သူလူထုကို စာနာထောက်ထားပြီး ကယ်ဆယ်ရေးနဲ့ ပြန်လည်ထူထောင်ရေးလုပ်ငန်းတွေကို အရှိန်မြှင့်ဆောင်ရွက်ဖို့အတွက် အပစ်အခတ် ရပ်စဲဖို့ ဆုံးဖြတ်ထားတယ်လို့ ဖော်ပြထားပါတယ်။
ယာယီအပစ်ရပ်ထားတဲ့ကာလအတွင်းမှာ တိုင်းရင်းသားလက်နက်ကိုင်အဖွဲ့တွေနဲ့ အခြားလက်နက်ကိုင်အဖွဲ့တွေအနေနဲ့ အများပြည်သူသွားလာဖြတ်သန်းတဲ့လမ်းတွေကို ဖျက်ဆီးတာ၊ ပြည်သူတွေရဲ့အသက်အိုးအိမ်ကို ထိခိုက်စေတာ၊ လုံခြုံရေးနဲ့ တရားဥပဒေစိုးမိုးရေးကိုဆောင်ရွက်နေတဲ့စစ်ကောင်စီတပ်ဖွဲ့ဝင်တွေရဲ့ တပ်စခန်းကို တိုက်ခိုက်တာတွေ မပြုလုပ်ဖို့နဲ့ နယ်မြေမချဲ့ထွင်ဖို့ကို တားမြစ်ထားပြီး တကယ်လို့ ဆောင်ရွက်ရင် လိုအပ်သလိုတုံ့ပြန်ပြီး အရေးယူမယ်လို့လည်း ရေးသားပြောဆိုထားပါတယ်။
ထုတ်ပြန်ချက်ထဲမှာ စစ်ကောင်စီအနေနဲ့ ကူညီကယ်ဆယ်ရေးနဲ့ ပြန်လည်ထူထောင်ရေးလုပ်ငန်းတွေကို အင်တိုက်အားတိုက်ဆောင်ရွက်နေတယ်လို့လည်း ပြောဆိုထားပါတယ်။ စစ်ကောင်စီအနေနဲ့ ရက် ၂၀သာ အပစ်အခတ်ရပ်စဲဖို့ ဆုံးဖြတ်ထားတာ ဖြစ်ပါတယ်။
လက်ရှိမှာ စစ်ကောင်စီဟာ ငလျင်ဒဏ်သင့်ဒေသတွေကို လေကြောင်းက တိုက်ခိုက်ခြင်း၊ တရုတ်ကြက်ခြေနီအသင်းရဲ့ထောက်ပံ့ရေးယာဉ်တန်းကို အကြောင်းကြားထားပေမယ့် စောင့်ဆိုင်းပစ်ခတ်ခြင်းတို့ကြောင့် စစ်ကောင်စီကို နိုင်ငံတကာအစိုးရများက ရှုတ်ချနေပြီး နိုင်ငံတကာသတင်းတွေမှာလည်း ဖော်ပြခံနေရပါတယ်။
