တနင်္သာရီတိုင်းဒေသကြီးမှာ စစ်ကောင်စီရဲ့ လေကြောင်းတိုက်ခိုက်မှုနဲ့ တိုက်ပွဲတွေကြောင့် ပြီးခဲ့တဲ့ ဖေဖော်ဝါရီလအတွင်း နေရပ်စွန့်ခွာသူ ၇၀၀၀၀ နီးပါးရှိတယ်လို့ FE5 Tanintharyi ဆွေးနွေးပွဲကနေ သိရပါတယ်။
တနင်္သာရီတိုင်းမှာ ပြီးခဲ့တဲ့ ဖေဖော်ဝါရီလအတွင်း ဖြစ်ပေါ်ခဲ့တဲ့ ပဋိပက္ခအခြေအနေတွေ၊ ဒေသခံလူထုအပေါ် သက်ရောက်မှုတွေ၊ စစ်ဘေးရှောင် အခြေအနေတွေ၊ လူမှုစီးပွားရေးအခြေအနေတွေနဲ့ ပတ်သက်ပြီး ဒီကနေ့မှာ ဆွေးနွေးပွဲပြုလုပ်ခဲ့တာပါ။
တနင်သာရီတိုင်းကို ကရခ စစ်တိုင်းမှူးရောက်ပြီးနောက်ပိုင်း ထိုးစစ်ဖွင့်လာတယ်လို့ဆိုပါတယ်။
စစ်ကောင်စီတပ်ဖွဲ့ဟာ ထိုင်း-မြန်မာနယ်စပ်ကုန်သွယ်ရေးလမ်းကို ပြန်ထိန်းချုပ်ဖို့ကြိုးစားနေတာကြောင့် လချီတိုက်ပွဲဖြစ်ပွားနေတာဖြစ်တယ်လို့ FE5 Tanintharyi ကသုံးသပ်ထားပါတယ်။
ဖေဖော်ဝါရီလ တစ်လတည်းမှာပဲ တိုက်ပွဲ ၆၆ ကြိမ်ထက်မနည်းနဲ့ မိုင်းဆွဲတိုက်ခိုက်မှု ၄ ကြိမ်ထက်မနည်းဖြစ်ခဲ့ပါတယ်။
အထူးသဖြင့် ဝေဟင်အားကို အဓိကအသုံးပြုပြီး လေယာဉ် ရဟတ်ယာဉ်အသုံးပြုတိုက်ခိုက်မှု ၂၂ ကြိမ်ထက်မနည်းရှိခဲ့တယ်လို့ FE5 Tanintharyi ဆိုပါတယ်။
တိုက်ပွဲတွေကြောင့် နေရပ်စွန့်ခွာထွက်ပြေးနေရတဲ့ စစ်ဘေးဒုက္ခသည် ခုနှစ်သောင်းနီးပါးဟာ စားနပ်ရိက္ခာနဲ့ ဆေးဝါးအတွက် အကူအညီတွေ လိုအပ်နေတယ်လို့လည်း ဆိုပါတယ်။
ပုံစာ – တနင်္သာရီတိုင်း အတွင်းက စစ်ဘေးရှောင်ပြည်သူများကိုတွေ့ရစဉ်
ဓာတ်ပုံ – တွဲလက်ညီညီ စစ်ဘေးရှောင်ကူညီရေးအဖွဲ့
