တနင်္လာရီတိုင်းမှာ စစ်ကောင်စီရဲ့စစ်ကြောင်းထိုးဝင်ရောက်တိုက်ခိုက်မှုတွေကြောင့် ဖောဖေါ်ဝါရီလ တစ်လ အတွင်း နေရပ်စွန့်ခွာ ထွက်ပြေးတိမ်းရှောင်ခဲ့ရသူ ၆၈၄၀၀ ကျော်အထိရှိခဲ့တယ်လို့ FE5 Tanintharyi က ဒီကနေ့မှာထုတ်ပြန်ပါတယ်။
ဖေဖော်ဝါရီလအတွင်း စစ်ကောင်စီတပ်က ကုန်သွယ်ရေးလမ်းမကြီးတွေ၊ ရေနက်ဆိပ်ကမ်း နဲ့ ဆက်စပ် ဧရိယာ ကို စစ်ကြောင်းထိုးဝင်ရောက်လာမှု၊ လေကြောင်း ရေကြောင်းက တိုက်ခိုက်မှု၊ နေအိမ်မီးရှို့မှု၊ အရပ်သား ဖမ်းဆီးသတ်ဖြတ်မှုတွေကြောင့် နေရပ်စွန့်ခွာထွက် ပြေးရမှု ပိုများလာခဲ့တယ်လို့လည်း ဆိုပါတယ်။
ယခုနောက်ပိုင်းတွင် စစ်ကောင်စီက လေကြောင်းအသုံးပြု တိုက်ခိုက်မှုပိုများလာခြင်းကြောင့် နေရပ်စွန့်ခွာရသူ ပိုများလာတယ်လို့လည်း ဆိုပါတယ်။
ထားဝယ်ခရိုင် အတွင်း ထားဝယ်၊ လောင်းလုံး၊ ရေဖြူ၊ သရက်ချောင်းမြို့နယ်တွေမှာ နေရပ်စွန့်ခွာထွက်ပြေးရသူ ပြည်သူ အနည်းဆုံး ၂၅၈၀၀ ကျော်ရှိခဲ့ကြောင်းနဲ့ မြိတ်ခရိုင် ပုလော၊ တနင်္သာရီ၊ မြိတ် နဲ့ ကျွန်းစုမြို့နယ်တွေမှာ တိုက်ပွဲဖြစ်ပွားမှု၊ ရေ ကြောင်း လေကြောင်းတိုက်ခိုက်ခံရမှုကြောင့် နေရပ်စွန့်ခွာခဲ့ရသူ အနည်းဆုံး ၄၂၅၀၀ ကျော်ရှိခဲ့တယ်လို့ သိရပါတယ်။
၎င်းတို့အနက် ပုလောစစ်ရှောင်စခန်းတွင် နေထိုင်သူ ၃၀၀၀ ဝန်းကျင်ရှိခဲ့ပြီး ကျန်သူများမှာ နီးစပ်ရာ တော တောင်၊ ခြံ၊ ရွာ၊ မြို့ပေါ်တွေကို ထွက်ပြေးတိမ်းရှောင်နေကြရတယ်လို့ ဆိုပါတယ်။
ပုလောမြို့နယ်တစ်ခုတည်းတွင် စစ်ဘေးကြောင့် နေရပ်စွန့်ခွာထွက်ပြေးခဲ့ရသူ ၂၃၀၀၀ ကျော်ရှိခဲ့ကြောင်းနဲ့ တနင်္သာရီမြို့နယ်မှာ စစ်ကောင်စီတပ်က နေ့စဉ်ရက်ဆက် စစ်ကြောင်းထိုး တိုက်ပွဲဖြစ် ပွားမှု၊ လေကြောင်း တိုက်ခိုက်မှုများကြောင့် ပြည်သူ ၁၇၀၀၀ ခန့် ရွာလုံးကျွတ် ထွက် ပြေးခဲ့ရတယ်လို့ ဆိုပါတယ်။
ကော့သောင်းခရိုင် ဘုတ်ပြင်းတွင်လည်း တိုက်ပွဲဖြစ်ပွားမှုကြောင့် ပြည်သူ ၁၀၀ ခန့် နေ ရပ်စွန့်ခွာ ထွက်ပြေး ကြရတယ်လို့လည်း ထုတ်ပြန်ထားပါတယ်။
စစ်ကောင်စီက တနင်္သာရီတိုင်းအတွင်းကို ဆန်၊ ရိက္ခာနှင့် ဆေးဝါးသယ်ယူခွင့်တွေ ကန့်သက်ထားတာကြောင့် ဒေသအတွင်းရှိ စစ်ရှောင်တွေ ဝမ်းရောဂါ၊ အရေပြားရောဂါ နဲ့ အသက်ရှူလမ်းကြောင်းဆိုင်ရာ ရောဂါတွေ အဖြစ်များနေပြီး ဆေးဝါးမလုံလောက်မှုတွေပါ ကြုံတွေ့နေရတယ်လို့ သိရပါတယ်။
ဓာတ်ပုံ – တောင်ပျောက်တိုက်နယ် စစ်ရှောင်ကူညီရေးအဖွဲ့
