၉ ဖေဖော်ဝါရီ ၂၀၂၆
ထိုင်းနိုင်ငံ စမွတ်ပရာကန်ခရိုင် ဘန်ဖလီမြို့နယ်မှာရှိတဲ့ မြို့တော်လျှပ်စစ်အာဏာပိုင် (MEA) ရဲ့ သင်တန်းကျောင်းအတွင်း ကြီးမားတဲ့ အမိုးခုံးပုံစံ အဆောက်အအုံတစ်ခု မနေ့က နံနက် ၁၁ နာရီခွဲလောက်မှာ ရုတ်တရက် ပြိုကျခဲ့တယ်လို့ သိရပါတယ်။
အဲ့ဒီအဆောက်အအုံဟာ Mueang Mai Bang Phli အိမ်ရာဝန်းအတွင်းမှာ တည်ရှိပြီး ဖြစ်စဉ်ဖြစ်ပွားချိန်မှာ အတွင်းပိုင်းမှာ ဝန်ထမ်းတွေ သို့မဟုတ် အလုပ်သမားတွေ ရှိနေခဲ့နိုင်တယ်လို့ ကနဦးသတင်းတွေမှာ ဖော်ပြထားပါတယ်။ လက်ရှိအချိန်ထိ ဒဏ်ရာရသူ အရေအတွက်ကို တရားဝင် အတည်မပြုနိုင်သေးဘဲ ရှာဖွေကယ်ဆယ်ရေးလုပ်ငန်းတွေ ဆက်လက်လုပ်ဆောင်နေဆဲဖြစ်ပါတယ်။
ဖြစ်စဉ်ဖြစ်ပွားပြီးနောက် Poh Teck Tung Foundation နဲ့ Bang Phli ကယ်ဆယ်ရေးအဖွဲ့တွေ အခင်းဖြစ်ရာနေရာကို ရောက်ရှိခဲ့ပေမယ့် အဲ့ဒီနေရာဟာ နိုင်ငံပိုင်လုပ်ငန်းနယ်မြေဖြစ်တယ်ဆိုပြီး MEA ဘက်က ပြင်ပကယ်ဆယ်ရေးအဖွဲ့တွေကို ဝင်ရောက်ခွင့်မပေးဘဲ ဌာနတွင်းအဖွဲ့တွေကသာ ကိုင်တွယ်မယ်လို့ ဆုံးဖြတ်ခဲ့တယ်လို့ သိရပါတယ်။
အာဏာပိုင်တွေက အခင်းဖြစ်ရာနေရာပတ်ဝန်းကျင်ကို လုံခြုံရေးအရ ပိတ်ဆို့ထားပြီး အဆောက်အအုံရဲ့ ဖွဲ့စည်းပုံ မတည်ငြိမ်သေးတာကြောင့် ထပ်မံပြိုကျနိုင်တဲ့ အန္တရာယ်ရှိနေတယ်လို့ ဆိုပါတယ်။ အင်ဂျင်နီယာတွေက နည်းပညာပိုင်းဆိုင်ရာ စစ်ဆေးမှုတွေ ဆောင်ရွက်နေဆဲဖြစ်ပါတယ်။
ဒီဖြစ်စဉ်နဲ့ပတ်သက်ပြီး အဆောက်အအုံ တည်ဆောက်ပုံအရည်အသွေး၊ ကြီးကြပ်မှုနဲ့ ဘေးကင်းလုံခြုံရေးစံနှုန်းတွေကို ပြန်လည်စစ်ဆေးဖို့ လိုအပ်နေကြောင်းလည်း စောင့်ကြည့်သူတွေက ထောက်ပြနေကြပါတယ်။
