၃ မတ်၊ ၂၀၂၅
ရန်ကုန်မြို့ပတ်ရထားလမ်းပိုင်းမှာ RBE ရထားတွေနေရာမှာ အစားထိုးပြေးဆွဲနေတဲ့ စပိန် နိုင်ငံထုတ် DEMU ရထားတွေကို စီးနင်းသူခရီးသည်မရှိတာကြောင့် အရှုံးပေါ်နေတယ်လို့ သိရပါတယ်။
ရန်ကုန်မြို့ပတ်ရထားခရီးစဉ်မှာ စပိန်နိုင်ငံထုတ် Diesel Electric Multiple Unit (DEMU) ရထားသစ်များဖြင့် ၂၀၂၄ ခုနှစ် နိုဝင်ဘာလ ၂၉ ရက်မှ စတင်၍ ရထား ၁၅ စင်း ဖြင့် တစ်ရက်လျှင် သုံးကြိမ် ပြေးဆွဲပေးခဲ့ တာဖြစ်ပါတယ်။
ယခုအခါမှာတော့ တစ်ကြိမ်သာပြေးဆွဲပေးပြီး ခရီးသည် ၃၀ ဝန်းကျင်သာရှိတယ်လို့ စုံစမ်းသိရှိရပါတယ်။
ခရီးသည်စီးနင်းမှုနည်းပါးရခြင်းမှာ မြင့်တက်နေတဲ့ရထားလက်မှတ်ခကြောင့်ဖြစ်တယ်လို့ မီးရထားက တာဝန်ရှိသူတစ်ဦးက New Day Myanmar ကိုပြောပါတယ်။
ရန်ကုန်မြို့ပတ်ရထားခရီးစဉ်အတွင်း RBE ဂျပန်တွဲဆိုင်းရထားနှင့် DEMU ရထား စီးနင်းခ ဈေးနှုန်းများကို ယခင်က တပြေးညီသတ်မှတ်ထားပြီး ခရီးစဉ်တစ်ဝက်ဖြစ်တဲ့ (ဝ) မိုင်မှ (၁၅) မိုင်ထိကို ၄၀၀ ကျပ်နှင့် ခရီးစဉ်အစအဆုံး (0) မိုင်မှ မိုင် (၃၀) အထိကို ၈၀၀ ကျပ် သတ်မှတ်ထားပါတယ်။
ယခုအခါမှာတော့ စပိန် နိုင်ငံထုတ် DEMU ရထားလက်မှတ် နှုန်းထားခများကို ဒီဇင်ဘာ လဆန်းပိုင်းမှစတင်၍ ခရီးစဉ်တစ်ဝက်အထိကို ၅၀၀ ကျပ်နှင့် ခရီးစဉ် အစအဆုံးကို ၁၀၀၀ ကျပ်အဖြစ် ပြောင်းလဲ တိုးမြှင့်သတ်မှတ်ထားတာဖြစ်ပါတယ်။
