နိုင်ငံတဝှမ်းမှာ စစ်ရှုံးနေပြီး စစ်သားလိုအပ်ချက် များပြားနေတဲ့ စစ်ကောင်စီက ၂၀၂၁ ခုနှစ်၊ ဖေဖော်ဝါရီလ ၁ ရက်နေ့ နောက်ပိုင်းက စတင်ပြီး EAO များတည်ရှိရာနေရာတွေနဲ့ပြည်ပနိုင်ငံများသို့ ရောက်ရှိနေတဲ့ နိုင်ငံသားတွေကို နိုင်ငံအတွင်းပြန်လာဖို့ မတ်လ ၂၁ ရက် က ကြေညာချက်ထုတ်လိုက်ပါတယ်။
စစ်ကောင်စီီီီရဲ့ကြေညာချက်ထဲမှာတော့ နိုင်ငံတော်တည်ငြိမ်အေးချမ်းရေးကိုမလိုလားတဲ့ ပြည်တွင်း၊ ပြည်ပမှ လူပုဂ္ဂိုလ်၊အဖွဲ့အစည်းများရဲ့ သွေးထိုးလှုံ့ဆော်မှု၊ ခြောက်လှန့်မှုတို့ကြောင့် အချို့သောကျောင်းသား၊ ကျောင်းသူလူငယ်လူရွယ်များ၊ နိုင်ငံ့ဝန်ထမ်းများနှင့်မိမိတို့နိုင်ငံသားများသည် EAO များတည်ရှိရာနေရာများနှင့် ပြည်ပနိုင်ငံများသို့ စိုးရိမ်စိတ်များဖြင့် တိမ်းရှောင်နေတယ်လို့ ဆိုပါတယ်။
ပြည်ပရောက်နိုင်ငံသားတွေအနေနဲ့ လုံခြုံရေးအာမခံချက်မရှိမှု၊ လူမှုစီးပွားဘဝ အဆင်မပြေခက်ခဲမှုတို့နဲ့ ရင်ဆိုင်နေရတာကြောင့် မိမိတို့နေရပ်ဒေသအသီးသီးကို ပြန်လာလိုတဲ့ ဆန္ဒများဖြစ်ပေါ်နေတယ်လို့ ထုတ်ပြန်ချက်မှာ ဖော်ပြထားပါတယ်။
စိုးရိမ်စိတ်ကြောင့် ထွက်ပြေးတိမ်းရှောင်နေကြတဲ့ဝန်ထမ်းများ၊အသိပညာရှင်၊ အတတ်ပညာရှင်များ၊ အခြားနယ်ပယ်အသီးသီးမှပုဂ္ဂိုလ်များ၊ နိုင်ငံသားများအား စစ်ကောင်စီအနေနဲ့ အထူးသက်ညှာစွာ ဖြေလျော့ဆောင်ရွက်ပေးမယ်လို့ ဆိုပါတယ်။
ဒါပေမယ့် ဒီလိုဖိတ်ခေါ်တာဟာ စစ်သားလိုအပ်ချက်များနေတဲ့ စစ်ကောင်စီရဲ့ ရိုးသားစွာ ဖိတ်ခေါ်မှုမဟုတ်ဘူးလို့ CDM ကျောင်းသားတဦးက New Day Myanmar ကိုပြောပါတယ်။
“အထဲက လူတွေတောင် အပြင်ပေးမထွက်ပဲ အတင်း အဓမ္မစစ်မှုထမ်းခိုင်းနေတာ၊ အပြင်ရောက်နေတဲ့ သူတွေပြန်ခေါ်တယ်ဆိုတာ သေချာတယ် ပြန်ဝင်တာနဲ့ စစ်ထဲ ထည့်မှာပဲ။”လို့ သူက သုံးသပ်ပါတယ်။
ပြီးခဲ့တဲ့ လပိုင်းတွေကလည်း ထိုင်းနိုင်ငံမှာ တရားမဝင်နေထိုင်လို့ ဖမ်းမိတဲ့ မြန်မာနိုင်ငံသားတွေကို ထိုင်းအစိုးရက မြန်မာပြည်ပြန်ပို့ရာမှာ ပြန်ပို့ခံရသူတွေကို စစ်မှုထမ်းဖို့ အတင်းအကြပ်ခိုင်းစေခံရမှုတွေရှိနေပါတယ်။
ပုံစာ – စစ်မှုထမ်းရန် စုဆောင်းခံရသူများအား ၂၀၂၄ ခုနှစ် စက်တင်ဘာလ အတွင်းက တွေ့ရစဥ်။ဓာတ်ပုံ-စကစ
