နိုင်ငံအဝန်း တိုက်ပွဲဖြစ်ပြီး စစ်ရှုံးနေတဲ့ စစ်ကောင်စီဟာ ငြိမ်းချမ်းရေးဆွေးနွေးပွဲ ၂၀၂၅ ကို နေပြည်တော် MICC (၂ ) မှာ ကျင်းပနေပါတယ်။
စစ်ကောင်စီဗိုလ်ချုပ်ကြီးရာပြည့် အပါအဝင် စစ်ကောင်စီအရာရှိတွေ၊ ပြည်ထောင်စုဝန်ကြီးတွေတိုင်းရင်းသားလက်နက်ကိုင်အဖွဲ့တချို့က ကိုယ်စားလှယ်တွေ နိုင်ငံရေးပါတီတွေနဲ့ စီးပွားရေးလုပ်ငန်းရှင်တွေ ပါဝင်ဆွေးနွေးသွားမယ်လို့ သိရပါတယ်။
ငြိမ်းချမ်းရေးလုပ်ငန်းစဉ်အပေါ်မှာ ကဏ္ဍအသီးသီးက ထင်ပေါ် ကျော်ကြားသူတွေ၊ အသိပညာရှင်၊ အတတ်ပညာရှင်တွေက ပိုမိုအာရုံစိုက် ပါဝင်လုပ်ဆောင်နိုင်စေဖို့၊ ငြိမ်းချမ်းရေး အတွက် အကြမ်းမဖက်တဲ့နည်းလမ်းနဲ့ ဆောင်ရွက်ခြင်းကသာ ရေရှည်တည်တံ့မှာဖြစ်ကြောင်းကို လူထုအကြား အသိအမြင်တိုးမြှင့်လာစေဖို့၊ နိုင်ငံအတွင်းပဋိပက္ခတွေ အမြန်ဆုံးလျှော့ချပြီး နိုင်ငံရေး၊ စီးပွားရေးတွေ ပိုမိုတိုးတက် ကောင်းမွန် လာစေမယ့် ရေတို-ရေရှည် လုပ်ငန်းစဉ်တွေ ဖော်ထုတ်နိုင်ဖို့အတွက် ဒီဆွေးနွေးပွဲကို ကျင်းပတာဖြစ်တယ်လို့ သိရပါတယ်။
အဆိုပါ ဆွေးနွေးပွဲကို မတ်လ (၂၄) ရက်မှ (၂၆) ရက်အထိ (၃) ရက်တာ ကျင်းပသွားမှာဖြစ်ပါတယ်။
စစ်ကောင်စီအနေနဲ့ ငြိမ်းချမ်းရေးဆွေးနွေးပွဲလို့ပြောပေမယ့် တစ်ဖက်မှာလည်း အရပ်သားပြည်သူတွေကို ပစ်မှတ်ထားပြီး လေယာဉ်ဗုံးကြဲတိုက်ခိုက်နေတာလည်းဖြစ်ပါတယ်။
ဓါတ်ပုံ – စစ်ကောင်စီ
