Homeပြည်တွင်းသတင်းစစ်မှုထမ်းဥပဒေကြောင့် အိမ်နီးချင်းနိုင်ငံတွေကို ထွက်ခွာနေရဟု IOM ရဲ့ အာရှဆိုင်ရာ ဒုတိယအကြီးအကဲပြော

စစ်မှုထမ်းဥပဒေကြောင့် အိမ်နီးချင်းနိုင်ငံတွေကို ထွက်ခွာနေရဟု IOM ရဲ့ အာရှဆိုင်ရာ ဒုတိယအကြီးအကဲပြော

၂၃ မတ်၊ ၂၀၂၅

ပြည်တွင်းထဲက လူငယ်တွေဟာ စစ်မှုထမ်းဥပဒေနဲ့ အကျုံးဝင်နေတာကြောင့် နိုင်ငံကို စွန့်ခွာပြီး ထိုင်းအပါအဝင် အိမ်နီးချင်းနိုင်ငံတွေဆီ ထွက်ခွာနေကြရတယ်လို့ နိုင်ငံတကာ ရွှေ့ပြောင်းနေထိုင်သူများအဖွဲ့(IOM) ရဲ့ အာရှဆိုင်ရာ ဒုတိယအကြီးအကဲ မီချီကို အီတိုက ပြောပါတယ်။

ထိုင်းနိုင်ငံ ဘန်ကောက်မြို့က လွှတ်တော်အဆောက်အအုံမှာ မတ်လ ၂၂ ရက်နဲ့ ၂၃ ရက် နှစ်ရက်တာ ကျင်းပနေတဲ့ မြန်မာ့နိုင်ငံရေး အခြေအနေနဲ့ ထိုင်း-မြန်မာနယ်စပ် လုံခြုံရေး အခြေအနေတွေအကြောင်း ဆွေးနွေးပွဲမှာ ထည့်သွင်းပြောကြားခဲ့တာဖြစ်ပါတယ်။

စစ်ကောင်စီက စစ်မှုထမ်းအသက်နဲ့ အကျုံးဝင်တဲ့လူငယ်တွေရဲ့ ပြည်ပထွက်ခွာခွင့်တွေကို ကန့်သတ်ပိတ်ပင်နေတာကြောင့် အခုလိုထွက်ခွာနေကြတာဖြစ်တယ်လို့ ဆိုပါတယ်။

ယခင်က မြန်မာရဲ့ အိမ်နီးချင်းနိုင်ငံတွေဆီကို ရွှေ့ပြောင်းလုပ်သားအများစုကသာ အလုပ်လုပ်ဖို့ ပြည်ပထွက်ခဲ့ကြတာဖြစ်တယ်လို့ မီချီကို အီတိုက ပြောပါတယ်။

ဒီလိုစွန့်ခွာတဲ့အကျိုးဆက်အနေနဲ့ နိုင်ငံတစ်နိုင်ငံရဲ့ စီးပွားရေး၊ စိုက်ပျိုးရေးအပြင် ကဏ္ဍအစုံက ဖွံ့ဖြိုးတိုးတက်မှုကို နှောင့်နှေးစေသလိုတစ်ဖက်မှာလည်း ပြည်ပကို ရွှေ့ပြောင်းလာကြတဲ့သူအများစုမှာ ရှင်သန်ရပ်တည်ဖို့ရာ အလုပ်အကိုင်ရှာဖို့ခက်ခဲနေကြတယ်လို့ ဆိုပါတယ်။

မတ်လ ၂၁ ရက်နေ့ကလည်း စစ်ကောင်စီအနေနဲ့ EAO ထိန်းချုပ်နယ်မြေတွေနဲ့ ပြည်ပနိုင်ငံအသီးသီးကို ရောက်ရှိနေကြတဲ့ မြန်မာနိုင်ငံသားတွေ ပြန်လာဖို့ ဖိတ်ခေါ်ထားပါတယ်။

ဒီဆွေးနွေးပွဲကို ထိုင်းလွှတ်တော်ကော်မတီက စီစဉ်ကျင်းပတာဖြစ်ပြီး မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေးအထူးကိုယ်စားလှယ် Tom Andrews၊ အမျိုးသားညီညွတ်ရေး အတိုင်ပင်ခံကောင်စီ NUCC၊ ပြည်ထောင်စုလွှတ်တော် ကိုယ်စားပြုကော်မတီ CRPH နဲ့ မြန်မာ့လူ့အခွင့်အရေးအဖွဲ့တွေ တက်ရောက်နေတယ်လို့ သိရပါတယ်။

ဓါတ်ပုံ – The Nation

ဆက်စပ် သတင်းများ

Most read