၂၂ ဇန်နဝါရီ ၂၀၂၆
ကုလသမဂ္ဂမှာ ကျင်းပနေတဲ့ လူသားမျိုးနွယ်အပေါ် ကျူးလွန်တဲ့ ရာဇဝတ်မှုတွေ ကာကွယ်ရေးနဲ့ အပြစ်ပေးရေးဆိုင်ရာ သဘောတူစာချုပ်အတွက် အကြိုပြင်ဆင်ရေးကော်မတီ ညီလာခံမှာ မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်းက ခိုင်မာတဲ့ နိုင်ငံတကာစာချုပ်တစ်ရပ် လိုအပ်နေပြီလို့ ပြောကြားခဲ့ပါတယ်။
ဦးကျော်မိုးထွန်းက “ရာဇဝတ်မှုကို လူတစ်ဦးချင်းစီ တာဝန်ယူရမယ်” ဆိုတဲ့ နူရင်ဘတ်အခြေခံမူဝါဒဟာ ယနေ့တိုင် အရေးပါနေဆဲဖြစ်ပြီး လက်ရှိ ဥပဒေဟာကွက်တွေကို စစ်ကော်မရှင်က အခွင့်ကောင်းယူပြီး ရာဇဝတ်မှုတွေကနေ လွတ်မြောက်ဖို့ ကြိုးစားနေတယ်လို့ ထောက်ပြခဲ့ပါတယ်။
ရိုဟင်ဂျာအရေးနဲ့ ပတ်သက်ပြီး ICJ မှာ ရင်ဆိုင်နေရတဲ့ ဂမ်ဘီယာနဲ့ မြန်မာ အမှုဟာ ဒီဟာကွက်တွေကို ပြသနေတဲ့ သာဓကတစ်ခုဖြစ်တယ်လို့လည်း ဆိုပါတယ်။
စစ်ကော်မရှင်ဟာ ရိုဟင်ဂျာတွေကိုသာမက မြန်မာပြည်သူအားလုံးအပေါ် လူသားမျိုးနွယ်အပေါ် ကျူးလွန်တဲ့ ရာဇဝတ်မှုတွေကို ဆက်လက်လုပ်ဆောင်နေဆဲဖြစ်ပြီး ၂၀၂၁ ခုနှစ်နောက်ပိုင်း သေဆုံးသူ ၇,၆၉၅ ဦး၊ လူ့အခွင့်အရေးချိုးဖောက်မှု ၂၃,၂၇၂ မှု၊ လေကြောင်းတိုက်ခိုက်မှု ၉,၀၀၀ ကျော်ကြောင့် သေဆုံးသူ ၄,၆၈၃ ဦးရှိခဲ့တယ်လို့ စာရင်းတွေက ဖော်ပြပါတယ်။
ဦးကျော်မိုးထွန်းက အတုအယောင် ရွေးကောက်ပွဲနဲ့ ဒီရာဇဝတ်မှုတွေကို ဖုံးကွယ်လို့ မရဘူးလို့ ပြောကြားခဲ့ပြီး နိုင်ငံတကာအသိုင်းအဝိုင်းအနေနဲ့ တာဝန်ယူမှုနဲ့ တာဝန်ခံမှုရှိအောင် ပိုမိုခိုင်မာတဲ့ ဥပဒေစနစ်တစ်ရပ်ကို အချိန်မီ ဖန်တီးဖို့ တိုက်တွန်းခဲ့ပါတယ်။
