၁၉ မတ်၊ ၂၀၂၅
ကရင်အမျိုးသားအစည်းအရုံး (KNU)၊ ကော်သူးလေအုပ်ချုပ်မှုနယ်မြေ၊ ခလယ်လွီထူခရိုင်၊ ဆောထိမြို့နယ် အတွင်း စစ်ကောင်စီတပ်က ပြည်သူလူထုတွေကို ပစ်မှတ်ထားပြီးတိုက်ခိုက်မှုကြောင့် စာသင်ကျောင်းနဲ့ နေအိမ်တွေ ထိခိုက်ပျက်စီးခဲ့သလို ပြည်သူ ၁ ဦးထိခိုက်ဒဏ်ရာ ရရှိခဲ့တယ်လို့ KNU ဗဟိုက သတင်းထုတ်ပြန်ပါတယ်။
၂၀၂၅ ခုနှစ် မတ်လ ၁၅ ရက်၊ နေ့လည် ၁း၅၀ မိနစ် အချိန်မှာ စစ်ကောင်စီရဲ့ နေပြည်တော်လေတပ်က သက်တူးကုန်းကျေးရွာထဲကို ပေါင် ၃၀၀ ဗုံးသီး ၂ လုံးနဲ့ လာရောက်ပစ်ခတ်ခဲ့ရာ ကျေးရွာနေ အသက် ၅၀ အရွယ် ဦးလှမိုးထိခိုက်ဒဏ်ရာရရှိခဲ့ရပြီး ဦးလှမိုးရဲ့ နေအိမ် ၁ လုံး နဲ့ကျေးရွာစာသင်ကျောင်းထိလိုက်ပျက်စီးခဲ့တယ်လို့ သိရပါတယ်။
၂၀၂၅ခုနှစ် မတ်လ ၁၄ ရက် ၁း၅၄ မိနစ်အချိန်ကလည်း စစ်ကောင်စီတပ် ခလရ-၂၆၄ တပ်ရင်းက ၁၂၀မမ ၃ လုံးပစ်ခတ်ရာ ကညင်ကျွန်းကျေးရွာထဲကျရောက်ပေါက်ကွဲပြီး ဒေါ်သောင်းမြင့်ရဲ့ နေအိမ်နဲ့ ဒေါ်ခင်ရဲ့နေအိမ် ကျည်စထိမှန် ပျက်စီးခဲ့တယ်လို့ ဆိုပါတယ်။
ခုလို စစ်ကောင်စီတပ်က ပြည်သူတွေကို ပစ်မတ်ထားပြီး အကြမ်းဖက် လုပ်ရပ်များအား လုပ်ဆောင်နေတာကြောင် ခလယ်လွီထူခရိုင် အတွင်းနေထိုင်တဲ့ အပြစ်မဲ့အရပ်သား ပြည်သူတွေ စိုးရိမ်ကြောက်ရွံ့ မှုမျာနဲ့ နေထိုင်နေကြရတယ်လို့ KNU က ထုတ်ပြန်ပါတယ်။
ပုံစာ – စစ်ကောင်စီ တိုက်ခိုက်မှုကြောင့် ပျက်စီးထိခိုက်မှုများကို မြင်ရစဉ်
ဓါတ်ပုံ – KNU
