ငလျင်ဒဏ်ကြောင့် မန္တလေး အိုးဘိုအကျဉ်းထောင်မှာ အကျဉ်းသား/သူ ၃ ဦးသေဆုံးခဲ့တယ်လို့ မြန်မာ နိုင်ငံလုံးဆိုင်ရာနိုင်ငံရေးအကျဉ်းသားများကွန်ရက်(PPNM)က ဒီနေ့မှာ ထုတ်ပြန်ပါတယ်။
အတည်ပြုပြီးသည့်အရေအတွက်အရ အိုးဘိုထောင်တွင်းရှိ အမျိုးသားဆောင် အလုပ်ရုံပြိုကျခဲ့တယ်လို့ အတည်ပြုထားပြီး အမျိုးသား(၁)ဦးသေဆုံးခဲ့ပြီး(၁)ဦးပြင်းထန်ထိခိုက်ဒဏ်ရာရရှိခဲ့ကြောင်းနဲ့ အဆောင် တွေကြား ကာရန်ထားတဲ့ အုတ်ရိုးတွေပြိုကျမှုရှိခဲ့တယ်လို့ ဆိုပါတယ်။
ဆက်လက်ပြီး အမျိုးသမီးအဆောင်မှာလည်း အဆောင်(၁) နဲ့ အဆောင်(၂)ပြိုကျခဲ့ပြီး အမျိုးသမီး အနည်းဆုံး (၂)ဦးသေဆုံးခဲ့ကြောင်း အတည်ပြုထားပြီး ထိခိုက်ဒဏ်ရာရရှိသူ(၁၀)ဦးခန့်ရှိခဲ့ကြောင်း အတည်ပြုထားတယ်လို့ ဆိုပါတယ်။
လက်ရှိ အရ PPNM ရရှိအတည်ပြုနေတဲ့ လက်ရှိသေဆုံးသူတွေမှာ အကျဉ်းသားဖြစ်ခြင်း နဲ့ ဝန်ထမ်းဖြစ် ခြင်းကို သီးခြားခွဲယူကောက်ယူနိုင်ခြင်းမရှိသေးပေမယ့် သေဆုံး မှုအားဖြင့်အတည်ပြုထားနိုင်သူ ကျား၊မအရေအတွက်စုစုပေါင်း(၄)ဦးရှိနေပြီဖြစ်တယ်လို့ ဆိုပါတယ်။
ထပ်မံအတည်ပြုနေဆဲသတင်းအရ သေဆုံးသူ စုစုပေါင်း(၁၂)ဦးအထိ ငလျင်ကြောင့် သေဆုံးကြောင်း ကနဦးသိရှိထားရမှုကို မိဘပြည်သူနဲ့ အိုးဘိုအကျဉ်းထောင်တွင်း အကျဉ်းချခံထားရတဲ့ အကျဉ်းသား ၊အကျဉ်းသူတွေရဲ့ မိသားစုဝင်တွေကို အသိပေးတယ်လို့ လည်းဆိုထားပါတယ်။
ဆက်လက်ပြီး စစ်ကောင်စီထုတ်ပြန်ထားတဲ့ ငလျင်ကြောင့်သေဆုံးထိခိုက်ဒဏ်ရာရသူစာရင်းမှာ အကျဉ်းထောင် မှသေဆုံးထိခိုက်ဒဏ်ရာရရှိသူတွေကို ထည့်ပေါင်းထားခြင်းရှိမရှိ မေးခွန်းထုတ်ဖို့ လိုအပ်နေပြီဖြစ်တယ်လို့ PPNMက ထုတ်ပြန်ထားပါတယ်။
ဓာတ်ပုံ -PPNM
