၁၈ နိုဝင်ဘာ၊ ၂၀၂၄
နိုဝင်ဘာ ၁၈ ရက် နေ့လည်ပိုင်းမှာ ဖယ်ခုံမြို့နယ်၊ ရီနွဲ့ကျေးရွှာအုပ်စု၊ လအိကျေးရွှာအနီးက ဘန်ကောက် စစ်ဘေးရှောင်စခန်းကို အကြမ်းဖက် စစ်ကောင်စီက လေကြောင်းက ဗုံးကြဲချ တိုက်ခိုက်မှု ထပ်ပြီး ဖြစ်ပွားခဲ့တယ်လို့ မိုးဗြဲ PDF က သတင်းထုတ်ပြန်ပါတယ်။
ဒီနေ့ နေ့လည် ၁၁နာရီ ၃၀ မိနစ်ဝန်းကျင်မှာ အရပ်သားပြည်သူ စစ်ဘေးရှောင်တွေ ရှိနေတဲ့ ဒီစစ်ဘေးရှောင်စခန်းကို တိုက်လေယာဥ် (၂) စင်းနဲ့ ပေါင် ၅၀၀ ဗုံး (၁) ကြိမ်၊ ပေါင် ၂၀၀ ဗုံးသီးကို တစ်ခါကြဲရင် (၂)ကြိမ်နှုန်းနဲ့ စုစုပေါင်း ဗုံး (၅) လုံးကို ၃ ကြိမ်ကြဲချခဲ့ပါတယ်။
အခု ဗုံးကြဲတိုက်ခိုက်ခံရတာကြောင့် ဘန်ကောက်စစ်ဘေးရှောင်စခန်းနဲ့ အနီးပတ်ဝန်းကျင်က ပြည်သူတွေရဲ့ တဲ၊ နေအိမ်၊ ဘာသာရေးဘုရားကျောင်း ၊ စပါးကျီတွေနဲ့ လူတချို့ ထိခိုက်ဒဏ်ရာရခဲ့ပါတယ်။
“ဘာကြောင့် ဒီနေရာကိုပဲ ထပ်ခါထပ်ခါကြဲရတာလဲ။ ငါတို့မှာ ဘာအပြစ်ရှိကြောင်းလဲ။” လို့ စစ်ဘေးရှောင်တစ်ဦးက ပြောဆိုခဲ့ကြောင်း သတင်းထုတ်ပြန်ချက်မှာ ဖော်ပြထားပါတယ်။
ဘန်ကောက်စစ်ဘေးရှောင်စခန်းကို စက်တင်ဘာလ ၅ ရက် ညပိုင်းကလည်း လေကြောင်းက ဗုံးကြဲချတိုက်ခိုက်ခဲ့ပြီး အဲ့ဒီံအခါက ကလေးငယ် ၆ ဦးနဲ့ အမျိုးသမီး ၃ ဦး သေဆုံးခဲ့ပြီး ကလေးတွေအပါအဝင် လူ ၁၀ဦးနီးပါး ဒဏ်ရာရရှိခဲ့ပါတယ်။
ဘန်ကောက်စစ်ဘေးရှောင်ခန်းကို လေကြောင်းက တိုက်ခိုက်ခံရပြီးနောက် အများစုက တခြားနေရာကို ပြောင်းရွှေနေထိုင်ပေမယ့် ပြောင်းရွှေ့ဖို့ အခက်အခဲရှိနေတဲ့ တချို့စစ်ရှောင်တွေက ဆက်ပြီး ကျန်ရစ်ခဲ့တာ ဖြစ်ပါတယ်။
ပုံစာ – ထပ်ပြီးလေကြောင်းက ဗုံးကြဲချခံခဲ့ရတဲ့ ဘန်ကောက်စစ်ရှောင်စခန်းမြင်ကွင်း
Photo – 1007 MOBYE PDF 2
